Kölıkte radiony qosqanmyn. «Senı jylytatyn, senı jylatatyn da endı sūmyrai joq! Endı sūmyrai joq!» degen ändı estıp, eseŋgırep qaldym. Sūmyraiy nesı dedım? Ännıŋ mänı osynşalyqty tömendeitındei sözdıŋ män-maǧynasyn tüsınuden qaldyq pa sonda?
Gakku TV-nyŋ YouTube-taǧy arnasynda osy ändı 500 myŋǧa juyq adam tyŋdapty. Ärine, jastar tyŋdap, tamaşalady. Sodan keiın jastar bır-bırıne «sūmyrai» dep aityp jürse, kımge renjisız? Eşkımge. Öitkenı jastarǧa «sūmyrai» trend sözge ainalyp ketpesıne kım kepıl? Sūraqtan sūraq osylai tuyndai beredı.
Bıle bılsek, sūmyrai – jauyz, zalym, jeksūryn degen maǧyna beredı. Taǧy bır mänı – jalǧyz aiaqty, jalǧyz közdı maqūlyq. Halyq ışınde sūmyrai kelgen jaqtan bır apat, ne jūt, ne aşarşylyq bolady degen nanym bar. Sūmyrai kelse, su qūridy degendı de jaqsy bılemız.
Baiaǧyda sūmyraidyŋ atyn atatpai, jaman yrymǧa balaityn bolsa, bügın änge qosyp, oǧan beinebaian tüsırıp, jastardyŋ jappai qoldanuyna jol aşyp otyr. Bızdıŋ ideologiianyŋ türı osy!
Şyny kerek, ruhani sanamyzdy susyndatatyn änge emes, daŋǧyr-düŋgırı basym änge äues boldyq.
Myna ännıŋ sözıne nazar salaiyqşy: «Jüregım menıŋ – molodoi. Dostarym menıŋ – zolotoi. Bauyrlarym – dorogoi…». Şırkın-ai, baiaǧy aqyndardyŋ, sazgerlerdıŋ körkemdık keŋesı bolsa: «Qaraǧym, şamaŋ kelmeitın şoqpardy belıŋe bailama» dep qaitarar edı.
Jelıdegı jelıkken myna reptıŋ sözın qaraŋyz: «Ei, jyndy qyz, tyŋda! Būl saǧan arnalady, Men saǧan bara alam qatty saǧynǧanda, myna ömırde bärı jalǧan, tazalyq qalmaǧan, adaldyq degen närse kışkene ǧana qalǧan, oilanyp qarasam, senımen ǧana jarasam, Ei, jyndy qyz!». Sondaǧy jyndy qyzdyŋ jauaby: «Ei, jyndy bala menı tyŋda, Menı süiemın deseŋ koroche, quma, mende saǧan degen sezım joq…».
Mıne, jetken jerımız osy!
Adam sözben öz oiyn aitady, ışkı oiyn tanytady, öz oiyn jüieleidı, iaǧni tıl – bolmysyn bıldıretın qūral. Endeşe, bügıngı jastardyŋ tanym-tüsınıgı men talǧam-talabyn tüsınuge bolatyndai.
