Qazaqtyŋ küi önerı tökpe jäne şertpe syndy ekı ülken baǧytqa bölınetını belgılı. Būl öner türı aimaqtyq erekşelıkterıne qarai bırneşe mektepke tarmaqtalatyny da aian. Osynyŋ ışınde küişılerdıŋ oryndauşylyq mänerıne män bere bermeidı ekenbız.
Mäselen, Qūrmanǧazy men Dinany alaiyq. Dina küi atasynyŋ şäkırtı bolyp sanalǧanymen, küidı bölekşe tartatyn. Tättımbettıŋ küilerın Äbıken Hasenov jetkızse, Äbıkennıŋ de özındık mänerı boldy. Arǧy zamandardy aitpaǧanda, bertınde Uäli Bekenov, Qali Jantıleuov, taǧy basqa osy qatarǧa kıretın asqan küişıler özderınıŋ oryndauşylyq dästürlerın qalyptastyrdy. Qazır aramyzda sol dästürdı ūstap qalǧan küişıler bar. Alaida sondai adamdar az.
Juyrda osyndai äŋgımenı №3 muzykalyq mektepte şeberlık sabaǧyn ötkızgen küişı, kompozitor, dirijer, Qazaqstannyŋ eŋbek sıŋırgen qairatkerı Aitqali Jaiymovtyŋ auzynan estıdık. Is-şarany «Qazaq küişılerı» qoǧamdyq qory ūiymdastyrdy.
Maitalman muzykanttyŋ pıkırınşe, küişınıŋ oryndauşylyq mänerın onyŋ stilı dep atasaq, qazırgı dombyraşylarda sol stildı saqtau joǧalyp barady. Bügıngı oryndauşylar «Adaidy» nemese basqa belgılı bır küilerdı tartqanda artyq iırımderdı köp qosady. Baisaldy, bırqalypty tartu joq, tym jyldamdatyp jıberedı. Aqyry küi ne anda, ne mynda emes bastapqy qalpynan ajyraǧan bolyp şyǧady.
Şeberlık sabaǧynda ol küi oryndauǧa bailanysty bıraz paidaly keŋesterdı berıp, qatysuşylardyŋ sūraqtaryna jauap berdı.
