Ötken jūma künı Ūlttyq muzeide halyq aqyndary, «Parasat» ordenınıŋ iegerlerı Qonysbai Äbıl, Äselhan Qalybekova jäne «Qūrmet» ordenınıŋ iegerı Äsiia Berkenova elordalyq oqyrmandarymen qauyşty. Oŋtüstık Qazaqstan men Qostanai oblystarynyŋ Astanadaǧy künderınıŋ aiasynda ūiymdastyrylǧan basqosuǧa aitys pen öleŋ süier qauym köp jinaldy.
Jiyndy Qostanai oblysynyŋ äkımı Arhimed Mūhambetov aşyp, keş ielerıne ızgı tılegın jetkızdı. «Memleket basşysy Nūrsūltan Nazarbaevtyŋ sarabdal saiasaty ekonomikamyzben qosa, mädenietımızdıŋ de örıstei damuyna yqpal etıp keledı. Būl jolda qazır törımızde otyrǧan halyq aqyndarynyŋ sıŋırgen eŋbekterı orasan zor ekenın aituǧa tiıspız. Olar, äsırese, seksenınşı jyldary aitys sahnasyna jarq etıp şyǧyp, künı bügınge deiın uälı, dualy sözderın türlı mınberlerden halyqqa jetkızude. Öleŋmen örılgen şumaqtary qai uaqyttyŋ da jadynan öşpek emes» dep aǧynan jarylǧan aimaq basşysy Qonysbai Äbıl men Äsiia Berkenovany «Qostanai oblysyna – 80 jyl» merekelık medalımen marapattap, Äselhan Qalybekovaǧa syi-siiapat jasady.
Basqosuda belgılı satirik Köpen Ämırbek söz söilep, üş aqynnyŋ ötken ömırınen tartymdy estelıkter äŋgımeledı. «Qonysbai, Äsiia, Äselhan – qazaq üşın oşaqtyŋ üş tūǧyry sekıldı. Aitys önerınıŋ ölkesıne bırge qadam basyp, bırge aryndaǧan būlardyŋ qai-qaisy da ūlt müddesı üşın ter töktı, söz suyrdy, qalam ūstady desek, älbette, qatelespeimız. Äsiia men Äselhan – aitystyŋ qos qarlyǧaşy, ekeuı bır jyly, bır aida, bır künde tuǧan. Tıptı, «halyq aqyny» ataǧyn bır künde alǧanyn bıreu bılse, bıreu bılmes. Äsiianyŋ syrty betpaq bolǧanymen, ışı – appaq. «Äi-äi» aqyn atanǧan Qonysbaidyŋ qoltaŋbasy özınşe bölek. Üşeuı de qazaq önerınıŋ qazanynda qainap, aitysty ılgerıletuge orasan küş salǧan» dedı satirik.
Şara barysynda jas aityskerler Marǧūlan Ospan men Däuren Ysqaq kezdesu ielerıne jyrdan şaşu şaşyp, köpşılıktıŋ yqylasyna bölendı. Al aqyndar dombyramen qosylyp, halyqty jyrmen susyndatty. Sonymen qatar, aitystyŋ däuırlegen şaqtarynan estelıkter aityp, qyzyqty äŋgımeler örbıttı. Ülken ekrannan körsetılgen derektı film de 1980-90 jyldardaǧy aitystan syr tarqatty.
Ashat RAIQŪL
