Asqar MAMİN: ŞEBERLIK MÜMKINDIGI BIRDEI EDI, BIRAQ SÄTTILIK QARSYLAS JAQQA BŪRYLYP KETTI
Asqar MAMİN, Qazaqstan hokkei federasiiasynyŋ prezidentı
Qazaqstan janküierı üşın astanalyq «Barys» hokkei komandasy ūlttyq brendımızge ainalǧandai bolyp otyr. Osydan on jyldai būryn hokkeiden aitarlyqtai dästürı joq qalamyzdy bügınde hokkei qalasy dersız. «Qazaqstan» sport saraiy aşylyp, ülken hokkeidı tamaşalai bastaǧanda malaqaiymyzdy aspanǧa atyp bır quanyp edık, endı elorda törınde taǧy bır hokkeige arnalǧan superstadion paidalanuǧa berılmekşı. Osynyŋ bärı Qazaqstan hokkei federasiiasynyŋ jüielı ärı maqsatty jürgızıp otyrǧan menedjmentı arqasynda jüzege asyrylyp otyrǧan igı ıster desek jarasady.
Qazaqstan komandalary bügınde KHL, VHL jäne MHL chempionattarynda sättı öner körsetude. «Saryarqa» komandasynyŋ byltyrǧy mausymda VHL chempionatynyŋ jeŋımpazy retınde Bratina kubogyn aluy, «Snejnye barsy» komandasynyŋ VHL chempionatynyŋ plei-off oiyndaryna tüsuı maqtanyp aituǧa tūrarlyq jetıstıkter dep esepteimız. Qazaqstan ūlttyq qūramasy bolsa biyl elitalyq divizionǧa qaita qosylu üşın bäsekege tüsu qyzu daiyndyq üstınde. Al, elımızdıŋ ışkı chempionatynyŋ bäsekesı de jyl saiyn tartysty ärı qyzyqty öte bastady.
Al elımızdıŋ eŋ basty klubtyq komandasy «Barys» üşın kontinentaldyq hokkei ligasynyŋ (KHL) 2014-2015 jylǧy mausymy aiaqtaldy. Astanalyq komanda chempionat barysynda üzdıkter qatarynan körınıp plei-off oiyndaryna öttı. Ökınışke qarai, syralǧy qarsylasymyz «Avangard» taǧy da jolymyzdy kestı. Osylaişa Gagarin kubogy üşın bäsekeden şyǧyp qaldyq. Jaqynda Qazaqstan hokkei federasiiasynyŋ prezidentı Asqar Mamin BESTNEWS.KZ aqparat agenttıgıne «Barys» komandasynyŋ biylǧy chempionattaǧy körsetkışterı turaly äŋgımelep berdı.
«Chempionat ädettegıdei oŋai bolǧan joq. Mausymnyŋ basynda jaqsy oiyn örnegı qalyptasqan edı, bıraq ortasynda eptep toqyrau bılındı. Al jalpy chempionattyŋ soŋyna qarai komandalyq oiyn tüzelıp, «Barys» Şyǧys divizony boiynşa 5-ınşı orynnan körındı. Plei-off bäsekesınde bır-bırıne sai komandalardyŋ oiynyn kördık. «Barystyŋ» da, «Avangardtyŋ» da jeŋuge mümkındıgı bırdei boldy. Ärine, «Avangard» jeŋıstı dästürı bar komanda, būryn Resei chempiony bolǧan, KHL chempionatynda da özındık ambisiiasy bar komanda. Soŋǧy matchta (plei-offtyŋ 7-ınşı oiyny) sättılık «Avangard» jaǧyna auysyp kettı. Al jalpy alǧanda «Barystyŋ» biylǧy chempionattaǧy körsetkışın qanaǧattanarlyq dep baǧalaimyn. Bas jattyqtyruşy jaily aitar bolsam, komandaǧa berılgen baǧalau Andrei Nazarovqa berılgen baǧa dep qabyldauǧa bolady».
Sonymen, qalyŋ janküierdıŋ süiıktı komandasyna ainalǧan «Barys» biylǧy mausymdaǧy oiyndaryn aiaqtady. Jetı ai boiy tartysty da, qyzyqty da oiyndarymen köpşılıktıŋ bırde köŋılın köterıp, bırde jüikesın jūqartqan komandamyzdy küzge deiın, iaǧni, jaŋa mausym aşylǧanşa asyǧa kütetın bolamyz.
