Ärıptesımız, «Astana aqşamy» gazetınde jauapty hatşy qyzmetın atqarǧan Ädılbek Japaq «Bolaşaq» baǧdarlamasymen oquǧa tüskende şyn quanyp, ınımızge sät sapar tılegenbız. Endı taǧy osyndai quanyşty basymyzdan keşıp otyrǧan jaiymyz bar. Ūjymymyzǧa qosylǧanyna bır jyldai ǧana uaqyt bolǧan daryndy jurnalist qaryndasymyz Botagöz Maratqyzy Londonǧa jurnalistık şeberlıgın şyŋdauǧa attanǧaly otyr.
Botagöz ortamyzǧa kelgende talaby taudai qyz ekenın bırden baiqatty. Ol bırden basylymymyzǧa «Äleumettık eksperiment» degen tyŋ aidar qosty. Jas jurnalist būl aidarmen şyǧatyn maqalalarynda qoǧamda özektı bolyp otyrǧan mäselelerdı köterdı. Mäselen, temekı şegetın aiaǧy auyr äielge syrttyŋ közqarasyn baǧamdady. Jūrttyŋ qala tazalyǧyna qalai qaraitynyn paiymdap kördı. Taǧy osy siiaqty oqyrmandy beijai qaldyrmaityn taqyryptardy qozǧap, ızdenımpazdyǧyn tanytty.
Qazır aǧa buyn jurnalisterdıŋ arasynda da onyŋ oqyrmandary bar dep aitsaq, qatelese qoimaspyz. Mysaly, gazetımızde ıstep ketken Örıs Iаşükırqyzynan byltyr sūhbat alǧan ärıptesımız Azamat Esenjol ol apai Botagözdıŋ qalam sıltesıne süisınetının aityp kelgen. Taǧy sol Azamat qūrdasym «Botagözdıŋ materialdaryn rahattanyp oqisyŋ» dep aitady. Būl – şyn söz. Jurnalistıŋ talantyna berılgen ädıl baǧa. Kezekşılık kezınde sıresken maqalalar kezdesedı. Amal joq, oquǧa tura keledı. Al Botanyŋ materialdarynan jylylyqtyŋ lebı esedı. Onyŋ qoiǧan taqyryptarynyŋ özı ūiqasyp tūrady. Ondaida ärıptes qaryndasymyzdyŋ boiynda aqyndyq öner bulyǧyp tūr-au dep oilaimyz. Kım bıledı, tyǧylyp jürıp öleŋ jazatyn da bolar. Äiteuır, poeziiany jaqsy köretını baiqalady. Jūmystaǧy Mädina, Güldana syndy syrlastary da onyŋ öleŋdı mänerlep oqyǧandy jaqsy köretının aitady.
Aitpaqşy, Botagöz kez kelgen taqyrypta erkın kösıletınımen de ūjymdy täntı etude. Şaruaşylyq bolsyn, äleumettık, mädeni taqyryptardy jazuda da ärıptesterden qalyspaidy.
Körnektı aqyn Jūmatai Jaqypbaevtyŋ «Qol būlǧar» atty öleŋınde:
Jas danaǧa jany qūmar jan az ba,
Jaqsy önerdıŋ jaŋa tuǧan Ürkerı.
Keste tökşı qara sözben qaǧazǧa,
Qiialyŋmen toqyşy bır şılterı.
…Tek şarapat kütsın senen ızgı elıŋ,
Eŋ kielı boryşyŋdy orynda.
Qaldyrmaityn sausaǧynyŋ ızderın
Tabiǧattyŋ qoly bolsyn qolyŋ da – degen jyr joldary bar. Şetelge oquǧa baratyn daryndy qaryndasymyzǧa bız de sony tıleimız.
Amanǧali QALJANOV
