Futboldan Qazaqstan chempionatynyŋ premer-ligasynda ekınşı ainalym oiyndary bastaldy.
Bırınşı ainalymda köş basyn eşkımge bermegen «Astana» komandasy ekınşı ainalymdy da jeŋıspen bastap otyr. Qazaqstan chempiondary ekınşı ainalymnyŋ alǧaşqy oiynynda «Ordabasy» komandasymen kezdestı. «Astana Arena» stadionyna jinalǧan janküierler tört gol soǧylǧan qyzyqty ärı tartysty matchty tamaşalady. Būl oiyndaǧy esep tez aşyldy. Oiynnyŋ jetınşı minutynda Patrik Tvumasi «Ordabasy» qaqpasyna qarai aiyp dobyn oryndady. Äuelep jetken dop bır-bırımen iterısken oiynşylardyŋ ortasyna tüstı. Eşkımnıŋ yŋǧaiyna kele qoimaǧan ala dop taǧy bır köterılgende «Astana» qorǧauşysy Marin Anichich şiraq qimyl körsettı. Ol bärınen biık sekırıp dopty baspen ūryp qaqpanyŋ bos būryşyna däl baǧyttady. Osylaişa esep aşyldy.
Arada ekı minut ötpei-aq elordalyq qorǧauşylar şymkenttık qorǧauşy Simchevichtıŋ qalai alǧa şyǧyp ketkenın nazardan şyǧaryp aldy. Osylaişa astanalyq qaqpaşy Erichpen betpe-bet şyqqan Simchevich eseptı teŋıstırdı.
Al oiynnyŋ 21-ınşı minutynda şabuylşylarǧa ädemı pas şyǧaryp bere bıletın Serıkjan Mujikov taǧy da erledı. Despotovichten ädemı pas alǧan Serıkjan dopty qaqpaǧa özı soqsa da bolatyn edı, alaida ol özınen de sättı pozisiiada tūrǧan Kaniasqa pas şyǧardy. Al kolumbiialyq legionerımız bolsa mült ketpedı. Osylaişa esep eselenıp, 2:1 boldy.
Ekınşı taimnyŋ ortasyna deiın ekı jaq alma-kezek şabuyldarmen almasty. Alaida, asa qauıptı sätter tuyndai qoimady. Oiynnyŋ 72-ınşı minutynda ǧana tablodaǧy esep özgerdı. Taǧy da sol Tvumasi alǧa ūmtylyp, Almat Bekbaev qorǧaǧan qaqpaǧa qarai qatty soqqy jasady. Qanşalyqty qauıptı bolsa da būl dopty «Ordabasy» qaqpaşysy qaitarǧan edı. Bıraq qaitarǧan dobyna bırınşı jetken Taŋat Nöserbaevtyŋ soqqysyna tosqauyl bola almady. «Astana» kapitany soqqan osy gol aituly matchtyŋ nüktesın qoidy. Esep 3:1 bolyp tırkeldı.
Kelesı oiyndy astanalyqtar Petropavl qalasynda ötkızedı. Qazaqstan kubogynyŋ şirek finalynda «Qyzyljar SQ» komandasy men «Astana» kezdesedı.
Ǧalym QOJABEKOV
