Būl mereke bızdıŋ äulet üşın de asa qasterlı sanalady. Qara niettı faşizmmen şaiqasqan aituly soǧysqa Aqmola qalasynda tuǧan ülken atamyz Asqar İsenov te qatysyp, erlık körsetken.
Atamyz Qyzyl äsker qataryna 1939 jyly alynǧan. Otan aldyndaǧy mındetın ötep bolyp, endı elge oralamyn dep jürgende soǧys bastalyp ketedı. Sodan Ukraina maidanynan bır-aq şyǧady. Dnepr özenınen ötu üşın bolǧan qiian-keskı ūrysty basynan keşıredı. Osy operasiia barysynda körsetken qaisarlyǧy üşın polk basşylyǧynan alǧys alady. Ülken aǧatailarymyzdyŋ aitqandarynan estıgenımız Ūly Otan soǧysyna bırınşı künnen kırısken Asqar atamyz 1945 jyly Japoniiaǧa qarsy joryqqa da qatysyp, sodan keiın ǧana elge oralǧan.
Soǧystan aman-esen elge oralǧan atamyz Näzifa äjemızge jolyǧyp, ekeuı bırın-bırı ūnatyp, şaŋyraq qūrǧan. Atamyz beibıt ömırdıŋ eŋbek maidanynda da jemıstı eŋbek etken. Äjemız ekeuı jetı bala tärbielep-ösırgen. Ūldaryn ūiaǧa, qyzdaryn qiiaǧa qondyrǧan. Balalarynyŋ bärı tärbielı, joǧary bılımdı. Al sol balalarynan örbıgen köptegen nemerelerı ösıp qalsa, bır top şöberelerı de jügırıp jür. Men de bügın ardager atamnyŋ ruhyna basymdy iıp, barlyq nemere-şöberelerelerınıŋ atynan osy bır estelıgımdı jazyp otyrmyn.
Bız jyl saiyn 9 mamyr – Jeŋıs künınde Ūly Otan soǧysynyŋ maidangerı – Asqar atamyzdy eske alamyz. Erlıgıne taǧzym etemız. Endı bızdıŋ elımızdıŋ adamdary eşqandai soǧysqa qatyspasa eken dep tıleimız. Barlyq soǧys ardagerlerın Ūly Jeŋıstıŋ 70 jyldyǧymen qūttyqtaimyz. Qazaq elı güldene bersın dep tıleimız.
Nūrlan İSENOV
