Elorda äkımı Altai Kölgınov Sybailas jemqorlyqqa qarsy ıs-qimyl agenttıgınıŋ töraǧasy Alik Şpekbaevpen kezdestı. Qos tarap sybailas jemqorlyq täuekelderınıŋ aldyn alu men boldyrmau jäne halyqtyŋ äl-auqatyn arttyru boiynşa bırlesken jūmystyŋ jaŋa formatyn talqylady.
Kezdesu barysynda qala basşysy barlyq qūrylymdyq bölımşeler öz jūmysynda basymdyqty halyqtyŋ senımıne ie boluǧa berıp, olardyŋ qyzmetın tūrǧyndar baǧalau kerektıgın atap öttı. Sonymen qatar, ol sybailas jemqorlyqtyŋ aldyn alu ısınde barlyq memlekettık organdardyŋ bırlıgı men özara ıs-qimyly maŋyzdy röl atqaratynyn aitty.
«Azamattardyŋ senımı öte maŋyzdy. Uaqyt özgeredı, mehanizmder de eskıredı. Bızdıŋ jūmysymyzda nätije kerek. Soǧan jetu jolynda ärbır azamat ıstı özınen bastauy kerek» dedı äkım.
Öz kezegınde Alik Şpekbaev bügınde agenttıktıŋ jūmysy sybailas jemqorlyq täuekelderınıŋ paida bolu sebepterı men jaǧdailaryn, äkımşılık kedergılerdı, biurokratiialyq räsımderdı joiuǧa baǧyttalǧanyn atap öttı. Būl baǧytta «Adaldyq alaŋy» jobasynyŋ maŋyzy zor.
– Jalpy alǧanda, sybailas jemqorlyq körınısterınıŋ tömendeuı baiqalady. Sebebı ıstıŋ saldarymen emes, alǧaşqy paida bolu sebepterın joiuǧa basa nazar audaryluda. Ärı qarai da ıstıŋ alǧaşqy sebepterıne basa män berıletın bolady. Sondyqtan sızder de öz taraptaryŋyzdan osy baǧytta qoldau körsetulerıŋız kerek, – dedı töraǧa.
Kezdesude Sybailas jemqorlyqqa qarsy ıs-qimyl agenttıgı qalalyq departamentınıŋ jaŋa basşysy tanystyryldy. Būl qyzmetke Nūrlan Qydyrbaev taǧaiyndaldy. Al onyŋ bırınşı orynbasary Aqbılek Miadyeva boldy.
