Beisenbı künı Astana qalasy äkımı Ädılbek Jaqsybekovtıŋ töraǧalyǧymen Elbasy Nūrsūltan Nazarbaevtyŋ «Nūrly jol – bolaşaqqa bastar jol» atty Joldauyn talqylauǧa arnalǧan qala aktivınıŋ jiyny öttı. Onda elorda äkımı baiandama jasap, (baiandamanyŋ tolyq nūsqasy gazetımızde jariialanyp otyr).
Jiynda «Nūr Otan» partiiasy Astana qalalyq filialy töraǧasynyŋ bırınşı orynbasary Sapar Ahmetov, QR Parlamentı Senatynyŋ deputaty Vladimir Redkokaşin, Astana qalasy Käsıpkerler palatasynyŋ direktory Meiırbek Mäjitov, Europalyq qūqyq jäne adam qūqyqtary sarapşylyq institutynyŋ direktory Marat Başimov jäne «Obereg» ukraindar qoǧamy» qoǧamdyq bırlestıgınıŋ töraǧasy Tamara Şirmer oi-pıkırlerın ortaǧa saldy.
Sapar AHMETOV, «Nūr Otan» partiiasy Astana qalalyq filialy töraǧasynyŋ bırınşı orynbasary:
– Künı keşe barlyǧymyz Elbasy, partiia Töraǧasy Nūrsūltan Nazarbaevtyŋ Qazaqstan halqyna Joldauynyŋ kuäsı boldyq.
Prezident Joldauy tūŋǧyş ret «Nūr Otan» partiiasynyŋ Saiasi keŋesı otyrysynda jariia etıldı.
Būl el Prezidentınıŋ «Nūr Otan» partiiasyna degen tegeurındı qoldauy men tereŋ senımın bıldıredı.
Bız Elbasynyŋ biylǧy Joldauyn qazırgı geosaiasi jaǧdai men jahandyq qarjy-ekonomikalyq daǧdarysqa qarsy ūsynylǧan strategiialyq qūjat dep qabyldauymyz qajet.
«Nūrly Jol» jaŋa ekonomikalyq Saiasaty – osy qūjattyŋ özegı. Partiia Töraǧasy atap ötkenındei, ekonomikamyzdyŋ qarqyndy damyǧan kezeŋınde ırgesı nyǧaiǧan Ūlttyq qordyŋ tabysy almaǧaiyp zamanda el igılıgı üşın tiımdı qoldanylatyn bolady.
Būl Joldau astanalyqtar üşın tek saiasi jaǧynan ǧana emes, ekonomikalyq tūrǧydan airyqşa maŋyzdy. Aibyny artqan Astana aldaǧy uaqytta ışkı bırlık pen bekemdıktıŋ temırqazyǧyna ainalyp, elordalyq jasampazdyq pen damu ruhy el aimaqtaryna serpılıs beredı degen senımdemın.
Osyndai ūly maqsatqa qol jetkızıp, Prezident Joldauyn oryndau üşın barşamyz bır kısıdei atsalysyp qyzmet jasauymyz qajet.
Keler jyl – Egemendıgımız eŋsesın tıktep, Täuelsızdıktıŋ tūǧyry biıktep, «Mäŋgılık el» boludyŋ mändı jolyn aiqyndaityn jauapty kezeŋ. Qazaq handyǧynyŋ 550 jyldyǧy, Qazaqstan halqy Assambleiasy men Konstitusiiamyzdyŋ 20 jyldyǧy, Ūly Jeŋıstıŋ 70 jyldyǧy – qazaqstandyqtar üşın mereilı meje.
Vladimir REDKOKAŞİN, Parlament Senatynyŋ deputaty:
– Elbasynyŋ Qazaqstan halqyna Joldauy el ekonomikasyn damytudaǧy basym baǧyttardy aiqyndap berdı. Būl eldık qūjat «Qazaqstan – 2050» strategiialyq baǧdarlamasymen ündes. Memleket basşysy kezektı Joldauyn aiaq astynan jariia etuınde özındık män bar. Prezident öz sözınde bükıl älem jaŋa qaterlermen betpe-bet kelıp otyrǧanyn, dünie jüzındegı ekonomikalyq daǧdarys elımızdı de ainalyp ötpeitının aitty. Sondyqtan, jahandyq daǧdarys qiyndyqtarynyŋ aldyn alyp, naqty şaralar qabyldau üşın osyndai qadam jasalyp otyr. Memleket basşysy keibır pozisiialardy jedel türde qaita qarap, aldyŋǧy kezeŋderdıŋ josparlaryna tüzetu engızu üşın jedel ıske kırısu qajettıgın eskerttı. Būl şaralardyŋ barlyǧy şūǧyl qolǧa alynyp, kelesı jyldyŋ qaŋtarynan bastap jüzege asyrylmaq. Mūny der kezınde qabyldanǧan dūrys şeşım deuge bolady. Daǧdarysqa qarsy şaralardyŋ barlyǧy eŋ aldymen qazaqstandyqtardyŋ äl-auqatyn jaqsartudy közdeidı. Aitalyq, Prezident ekonomikalyq ösım men jūmyspen qamtudy qoldauǧa airyqşa män berıp otyr. Ükımetke Ūlttyq qordan 500 milliard teŋge kölemındegı qarjyny şaǧyn jäne biznestı nesieleuge, bank sektoryn sauyqtyruǧa, jaŋa investisiialar tartyp, kölık infraqūrylymyn damytuǧa jūmsaudy tapsyrdy. Memleket basşysy tūrǧyndardy qoljetımdı tūrǧyn üimen qamtamasyz etuge erekşe toqtalyp, ipotekalyq nesienı barynşa tömen paiyzben berudı tapsyrdy. Mıne, osynyŋ bärı elımızdıŋ kez kelgen qiyndyqtan sürınbei ötuge jol salyp, är azamattyŋ erteŋge degen senımın nyǧaitatyny anyq.
Meiırbek MÄJİTOV, Astana qalasy Käsıpkerler palatasynyŋ direktory:
Elbasymyzdyŋ kezektı Joldauy – köregen saiasatynyŋ körınısı. Joldauda ekonomikamyzǧa kerı äser etetın jaǧdailardy baiyptap, daǧdarystyŋ aldyn aluǧa baǧyttalǧan tapsyrmalar berıldı. Bızdıŋ 2008 jylǧy «daǧdarysqa qarsy» täjıribemız töngen qauıpke qarsy äreket ete alatynymyzdy däleldedı.
Joldauda qarastyrylǧan «Nūrly jol» jaŋa ekonomikalyq saiasatta şaǧyn jäne orta biznestı damytuǧa barynşa küş salu kerektıgı aityldy. Şaǧyn jäne orta biznestı jäne ırı käsıpkerlıktı jeŋıldıkpen nesieleuge qosymşa 100 milliard teŋge bölınetın boldy. Mūnda, ärine, tamaq jäne himiia önerkäsıbındegı, maşina jasaudaǧy, qyzmet körsetuler salasyndaǧy jobalardy jüzege asyruǧa, damytuǧa jaǧdai jasalyp otyr.
Būl baǧyttaǧy jūmystar qarqyn alyp, käsıpkerlıkke den qoiǧandar kün sanap köbeiıp keledı. Aǧymdaǧy jyldyŋ şılde aiynda şaǧyn-orta biznespen ainalysuşylar sany 211 600 adamdy qūrady, būl ötken jylmen salystyrǧanda 32 000 adamǧa artqanyn körsetedı. Soŋǧy toǧyz aida Käsıpkerler palatasynda käsıbın aşqysy kelgenderge baǧyt-baǧdar beru maqsatynda 6577 qyzmet körsetıldı.
Şaǧyn jäne orta biznes – memlekettıŋ ekonomikalyq qozǧauşy küşı. Sondyqtan onyŋ örıs alyp, kökjiegınıŋ keŋeiuıne, jaqsy nätijelerge qol jetkızuge küş salamyz. Bız Astana qalasy äkımdıgımen bırlesıp «Biznestıŋ damu kartasyn» jetıldıru üşın jūmys jasap jatyrmyz. Sonymen qatar, şaǧyn jäne orta biznes jürgızuge qolaily auqymdy İndustriialdy parkı salynyp jatyr.
Jaŋa ekonomikalyq saiasat elımızdıŋ äleuetın arttyruǧa tyŋ serpın beredı dep senım bıldıremız.
Tamara ŞİRMER, «Obereg» ukraindar qoǧamy» qoǧamdyq bırlestıgınıŋ töraǧasy:
– Eldık qūjatta aitylǧan är mäsele tūrǧyndardyŋ äleumettık jaǧdaiyn ılgerıletuge baǧyttalǧan. Tūrǧyndardy qoljetımdı baspanamen qamtamasyz etu, orta jäne şaǧyn käsıpkerlıktı damytu, jūmyspen qamtu, kölık jol infraqūrylymyn örkendetu, bırlıktı nyǧaitu – är azamattyŋ ömırın mändı etetın salalar legı. Elbasy memleketımızdıŋ aldynda ülken synaq tūrǧanyn aitty. Kez kelgen qiyndyqtan ötu üşın aldymen halyqtyŋ bırlıgı kerek. Prezident atap ötkendei, bız tūraqtylyqty baǧalai bılgenımızdıŋ arqasynda osyndai tabystarǧa jettık. Keiıngı ūrpaqqa amanattap qaldyratyn eŋ basty bailaǧymyz da bırlık ekenın Elbasy atap öttı. Kelesı jyly – Qazaqstan halqy assambleiasynyŋ 20 jyldyǧy atalyp ötpek. Bügınde osynau maŋyzdy şaraǧa är etnobırlestık yjdahattylyqpen daiyndalyp jatyr. Ärqaisysymyz öz josparymyzdy ūsyndyq. Küllı etnobırlestıkter «Astana – beibıtşılık pen kelısım qalasy» atty halyqaralyq forumǧa belsendı qatyspaqşy.
Marat BAŞİMOV, Europalyq qūqyq jäne adam qūqyqtary sarapşylyq institutynyŋ direktory:
– Elımızdıŋ ǧana emes, batystyŋ sarapşylary da Elbasy Joldauy äleumettık mındetterge de, halyqtyŋ äleumettık jaǧdaiyna da, äleumettık qūqylaryna da kepıldık berıp otyrǧanyn aityp jatyr. Mūndai kepıldıktı daǧdarys kezeŋınde älı bırde-bır memleket bergen emes. Joldau jüktegen tapsyrmalardyŋ ışınde qamtylmai qalǧany joq. Äsırese, halyqpen tıkelei bailanysty salalardyŋ barlyǧy da jıktelıp, olardy damytuǧa naqty mındetter atap körsetıldı. Mysaly, orta jäne şaǧyn biznestı 10 jylǧa bar-joǧy 6 paiyzben nesieleudıŋ būryn-soŋdy bolmaǧan şarty jasalǧanyn bılemız. Al şaǧyn käıpkerlıkpen ainalysatyndardyŋ denı – qarapaiym halyq. Demek, qazaqstandyqtarǧa jasalyp otyrǧan memleket qoldauy – būl. «Nūr Otan» partiiasy Saiasi keŋesınıŋ otyrysynda Sybailas jemqorlyqqa qarsy ıs-qimyldyŋ 2015-2025 jyldarǧa arnalǧan baǧdarlamasy bekıtıldı. Būl – kez kelgen qarjynyŋ sūrauy bar degen söz.
