Karantindık şekteulerden keiın biyl balalardyŋ jazǧy demalysyn ūiymdastyru ısı qaita jandanyp jatyr. Bılım jäne ǧylym ministrınıŋ orynbasary Şolpan Karinovanyŋ aituynşa, jazǧy uaqytta 3,3 mln oquşyny qamtu josparlanǧan. Al 2,3 mln oquşy sauyqtyru lagerınde demalatyn bolady. Jalpy, el boiynşa jazǧy sauyqtyru nauqanyn qarjylandyru üşın 4,53 mlrd teŋge qarastyrylǧan. Sonymen qatar respublika boiynşa 11 myŋnan asa mektep janyndaǧy, qala maŋyndaǧy, şatyrly, sporttyq jäne kiız üi lagerı jūmys ısteidı.
Respublika boiynşa jazǧy mektepter jūmysy 17 mausymǧa deiın jalǧasady. Sabaqtar matematika, mazaq jäne aǧylşyn tılderı, fizika, himiia jäne t.b. pänder boiynşa ūiymdastyryluda. Jazǧy mekteptıŋ erekşelıgı – muzei men tarihi nysandarǧa baru, taza auada ötetın sabaqtar dep aitar edık. Sondai-aq üi tapsyrmasy berılmeidı. Joǧary oqu oryndary janynan aşylǧan jazǧy mektepter de bar. Onda oquşylar tıl, IT-tehnologiia men robototehnika, biotehnologiia, käsıpkerlık negızderın oqidy.
Nūr-Sūltan qalasy boiynşa, mektep janyndaǧy lagerlerden bölek, 2 profildı, 2 qala syrtyndaǧy (Aqmola oblysyndaǧy Aqköl audanynda ornalasqan «Arman» jäne «Borovichok») jäne 2 şatyrly («Batyr» jäne «Tūlpar») lager jūmys ısteidı. Būl 176025 oquşyny qamtyp otyr. Elordalyq bılım basqarmasynyŋ mälımetınşe, 2 qala syrtyndaǧy (1440 bala), 2 şatyrly (960 bala), 2 beiındı (700 bala), sondai-aq Oquşylar saraiy janyndaǧy jazǧy lager (olar üş mausymǧa eseptelgen) jūmys ısteidı.
Jaz ailarynda balalardyŋ bos uaqytyn ūiymdastyru üşın jeke bılım beru jäne mädeniet mekemelerı öz ūsynystaryn äzırlegen. Atap aitqanda, astanalyq Stars Studio studiiasynda oquşylar üşın tört baǧyt boiynşa toptyq sabaqtar ūiymdastyrylady. Olar: akterlık şeberlık, vokal, bi jäne beineleu önerı.
Äl-Farabi atyndaǧy Oquşylar saraiynda balalarǧa arnalǧan 3 ortalyq jūmys ısteidı. Atap aitqanda, «Sana» jäne «Tanym» kreativtı tehnologiialar ortalyqtary. Mūnda 1-11-synyp oquşylary robot, oiyn men qosymşalar jasaudy tegın üirenedı. Al «Nūrsaia» tūrǧyn üi keşenınde ornalasqan «Bılım-park» öner-bılım ortalyǧynda 15-ke juyq üiırme bar. Olardyŋ ışınde horeografiia men IT üiırmesıne sūranys joǧary. Odan basqa oquşylar robototehnika, keme jasau, aviamodeldeu, videografika dombyra, boks, şahmat seksiialaryna tegın qatysa alady.
Qala syrtyndaǧy demalys
Nūr-Sūltannan 260 şaqyrym jerde Burabai men Şuchinsk kurorttary ornalasqan. Mūnda da balalarǧa arnalǧan arnaiy jazǧy demalys baǧdarlamasy bar. Burabai kölınıŋ soltüstık jaǧalauyndaǧy Edelweiss Borovoe lagerındegı 10 kündık demalys üşın 75 myŋ teŋge töleu kerek. «Jūldyzdy kontinent» balalar sauyqtyru-oiyn-sauyq ortalyǧyna 10 künge joldama 80-nen 95 myŋ teŋge aralyǧynda bolady. Bıraq Nūr-Sūltannan lagerge deiıngı jol şyǧyny būl baǧaǧa kırmeidı.
Şılde aiynan bastap elordadan 30 minuttyq jerde ornalasqan Qyzyljar orman şaruaşylyǧy aumaǧynda «Sarjailau» etnolagerı aşylady. Mūnda balalarǧa ūlttyq oiyndar men salt-dästürlerı üiretıledı. Sondai-aq kiız üi qūrylyp, ūlttyq taǧamdardyŋ jasalu ädısı körsetıledı. Etnolager 12-16 jastaǧy balalarǧa arnalǧan. Ötınışter 15 mausymnan bastap qabyldanady.
Elordalyq oquşylarǧa arnalǧan aqyly şeteldık lagerler de bar. Mäselen, Türkiiadaǧy Kemer qalasynyŋ Beldibi kurorttyq qalaşyǧyndaǧy bılım beru lagerınde 7-11 synyp aralyǧyndaǧy oquşylar qabyldanady. Bır oquşynyŋ 10 kündık demalysy 2750 eurony qūraidy. Būl baǧaǧa ūşu biletı (Nūr-Sūltannan), jatyn oryn, tamaqtanu, oqu jäne medisinalyq saqtandyru kıredı. Oqytudyŋ ärtürlı formattary bar. Mūnda toptyq ekskursiialar men şeteldık joǧary oqu oryndaryna tüsuge daiyndyq üiretıledı.
Balalar tömendegı sanattar boiynşa jazǧy lagerge tegın joldama alady:
- atauly äleumettık kömek alatyn otbasylar;
- ortaşa tabysy eŋ tömengı künkörıs deŋgeiınen tömen otbasylar;
- jetım jäne ata-anasynyŋ qamqorlyǧynsyz qalǧan balalar;
- otbasyndaǧy balalar şūǧyl kömektı qajet etetın otbasylar.
Tegın qyzmet alu üşın egov.kz nemese bılım basqarmasyna jazbaşa ötınış beru kerek.
Aizada JAIYQQYZY
