L.Gumilev atyndaǧy Euraziia ūlttyq universitetınde körnektı memleket jäne qoǧam qairatkerı jäne qazaq ädebietınıŋ klassigı Säken Seifullinnıŋ tuǧanyna 125 jyl toluyna arnalǧan «Säken Seifullin: tūlǧa jäne uaqyt» atty halyqaralyq konferensiia öttı. Jiynǧa Premer-ministrdıŋ orynbasary Berdıbek Saparbaev qatysty.
Biyl – halqymyzdyŋ üş bäiteregı – Säken, Iliias, Beiımbet atalarymyzdyŋ mereitoiy. Alǧaşqy toi tūlǧalardyŋ kındık qany tamǧan tuǧan jerınen bastau alyp, elımızdıŋ är öŋırınde ūlasuda. Elordadaǧy bas joǧary oqu ornynda ötken konferensiia sonyŋ bır jalǧasy deuge bolady.
Säkendı köp qazaq dauylpaz aqyn dep bıledı. Al onyŋ qairatkerlık qyry köp aitylmaidy. Şyn mänınde, ardaqty azamat qamşynyŋ sabyndai az ǧūmyrynda tuǧan halqynyŋ jarqyn bolaşaǧy üşın orasan eŋbek etıp, ülken ız qaldyrdy.
Jiyndy jürgızgen universitet rektory Erlan Sydyqov onyŋ ömırı men qairatkerlıgı jaiynda söz qozǧai kelıp: «Säken Seifullin – Qazaq elınıŋ taǧdyry synǧa tüsken sätte qairatkerlıgın körsetken tūlǧa. Ötken ǧasyrdyŋ 20-jyldarynyŋ basynda Halyq komissarlar keŋesınıŋ töraǧasy bolyp, elımızdegı köp salanyŋ damuyna airyqşa eŋbek sıŋırdı» dedı.
Konferensiiany resmi aşqan Ükımet basşysynyŋ orynbasary Berdıbek Saparbaev öz sözınde byltyr ötken Alaş qozǧalysynyŋ 100 jyldyǧy men halqymyzdyŋ ardaqty üş perzentı – Säken, Iliias, Beiımbettıŋ şyǧarmaşylyǧy men tartysqa toly taǧdyrlaryna toqtalyp, parasatty oi örbıttı.
– Täuelsızdık, memleketşıldık degen ūǧymdar – bır-bırımen jalǧasyp jatqan ūlaǧatty sözder. Būl tūrǧydan alǧanda, Säken Seifullinnıŋ orny bölek. Sonau qiyn-qystau jyldary ol kısıge qazaq memleketın basqaru oŋai bolǧan joq. Asyl azamat ortalyqtandyrylǧan bilıktıŋ öktemdıgıne qaramai, tereŋ aqyl-parasatynyŋ, kemel bılımdılıgınıŋ, alǧyrlyǧynyŋ arqasynda elımızdegı köptegen mäselelerdıŋ şeşıluıne yqpalyn tigızdı. Äsırese, el ışındegı äleumettık mäselelerge basa den qoiyp, mädeniet pen ädebietke janaşyr boldy, – dedı B.Saparbaev.
Jiyn barysynda Halyqaralyq türkı mädenietı men önerın bırlesıp damytu ūiymynyŋ bas hatşysy Düisen Qaseiınov körnektı qairatker turaly tolymdy oi aityp, «Üş arys: Säken, Iliias, Beiımbet» atty jaŋa kıtaptyŋ tanystyrylymyn jasady.
Qazaqstan Jazuşylar odaǧynyŋ töraǧasy Ūlyqbek Esdäulet qabyrǧaly qalamgerdıŋ 20-ǧasyr basyndaǧy qazaq ädebietınıŋ negızın qalauşy ǧana emes, söz önerıne qūbylys bolyp kelgendıgın aitty.
– Säken halyqtyŋ jüregınen jol tapqan qadau-qadau tuyndylarymen ädebietımızdıŋ köş basynan oryn alyp otyr. Onyŋ qazaq auyz ädebietınen jazǧan zertteu eŋbekterı joǧary oqu oryndarynda älı oqytylady. Zataevichtıŋ «Qazaqtyŋ 1000 änı» jinaǧyna da aqynnyŋ qosqan ülesı zor. Säken aǧamyz ömırde jan-jaqty adam bolǧan. İmanjüsıptı Qyzylordaǧa aldyrtyp, bır kün boiy änın tyŋdap, syrlasqan eken. Äbıken Hasenovtı tauyp alyp, küi tartqyzyp, onyŋ bır küiın «mynau Saidaly sary Toqanyŋ küiı dep aitty» degen äŋgıme de bar. Bır sözben aitqanda, Säkennıŋ esımı eşqaşan el esınen öşpeidı, – dedı.
Sondai-aq konferensiiada basqa da ǧalymdarmen bırge şet memleketterden kelgen qonaqtar Säken Seifullinnıŋ saiasi-qoǧamdyq qyzmetı, ǧylymi jäne jazuşylyq eŋbegı, şyǧarmaşylyq tūlǧasy turaly baiypty baiandamalar oqydy.
Farida KARİMOVA
