Astana qalalyq äkımdıgınde «Su tartudyŋ özektı mäselelerı: Aǧyndy sulardy tazartu. Jaŋbyr suy jäne su sıŋıru kärızderı» taqyrybynda halyqaralyq konferensiia öttı. Būǧan Astana qalasynyŋ äkımı Äset İsekeşev qatysty.
Sondai-aq, jiynǧa BŪŪ Damu baǧdarlamasynyŋ Qazaqstandaǧy tūraqty ökılı Norimasa Şimomura, Düniejüzılık damu bankınıŋ keŋesşısı Minahem Libhaber, Europalyq qaita qūru jäne damu bankınıŋ ökılı Kris Rodjers, qalalyq Kommunaldyq şaruaşylyq basqarmasynyŋ basşysy Tölegen Zakarianov keldı.
Aldymen söz alǧan qala äkımı jinalǧandarǧa Astanadaǧy su tartu, aǧyn sulardy tazartu salasyndaǧy jalpy jaǧdaidy baiandap şyqty. Sodan soŋ salanyŋ alda tūrǧan mındetterıne toqtaldy.
– Qazır bızdıŋ aldymyzda tūrǧan maqsat – elordany qai jaǧynan da jaily qalaǧa ainaldyru. Äsırese, jauyn kezınde tuyndaityn mäseleler özektı bolyp otyr. Osy oraida üzdık tehnologiialyq şeşımder äzırleu öte maŋyzdy. Būl baǧytta älemnıŋ aldyŋǧy qatarly täjıribesın zerdeleudı maqsat etıp otyrmyz. Sol üşın taqyryptyq josparlar äzırlenedı. Osy baǧytta halyqaralyq baiqaular ūiymdastyrǧanda, oǧan mındettı türde üzdık kompaniialar tartylady. Būǧan, ärine, otandyq ta, şeteldık kompaniialar da qatysa alady. Köptegen jobalar memlekettık-jekemenşık serıktestık negızınde jüzege asyrylatyn bolady. Qazırdıŋ özınde şamamen 100-den astam kompaniia öz tehnologiiasyn tanystyruǧa ynta tanytyp otyr, – dedı Äset İsekeşev.
Bügınde Astana äkımdıgınde su tartu mäselesın keşendı türde şeşu üşın jaŋbyr suyn aǧyzatyn kärız jüiesın odan ärı damytu baǧdarlamasy jasalyp jatqan körınedı. Būl baǧdarlamany jasaqtauǧa halyqaralyq instituttar, bılıktı injenerler tartylǧan. Qalalyq Kommunaldyq şaruaşylyq basqarmasynyŋ basşysy Tölegen Zakarianov konferensiia barysynda keŋınen toqtaldy.
– Bügın ǧana Ükımet otyrysynda jaŋbyr suyn aǧyzatyn kärızder nysandarynyŋ qūrylysyn qarjylandyru mäselesı qaraldy. Sonyŋ nätijesınde elordanyŋ kärız kollektorlary qūrylysyna 6,75 mlrd teŋge bölındı. Bız qazırgı uaqytta qalada nöser jauyndarǧa bailanysty oryn alyp otyrǧan mäselelerdı tolyq şeşuge qajettı qarjymen qamtamasyz etuge mümkındık bar, – dedı T.Zakarianov.
Onyŋ aituynşa, qazırgı uaqytta qalanyŋ barlyq aumaǧynan sudy aidaityn nysandardyŋ tızımı äzırlengen. Soǧan qatysty osy jyldan bastap ıske qosylatyn baǧdarlama da daiyndalǧan. Jalpy 2020 jylǧa arnalǧan baǧdarlama aiasynda 2017-2018 jyldary keşendı jūmystar atqarylu közdelıp otyr. Sonyŋ nätijesınde nöser jaŋbyrǧa bailanysty tuyndaityn mäseleler 2018 jyldyŋ soŋynda tolyq joiylady.
Kommunaldyq şaruaşylyq basqarmasynyŋ basşysy, sondai-aq , Taldyköl mäselesın de tılge tiek ettı. Qazırgı uaqytta köl tübındegı tūnbanyŋ 60 paiyzy tazartylǧan. Sonyŋ nätijesınde jaǧymsyz iıs bırşama azaiǧan. Jalpy, köldı qalpyna keltıru jūmystary jyl aiaǧyna deiın tolyq aiaqtalmaq.
Öz kezegınde söz alǧan şeteldık mamandar su tartu, sudy tazalau mäselelerıne qatysty Europanyŋ ozyq täjıribelerın ortaǧa saldy. Osy baǧyttaǧy öz ūsynystaryn jetkızdı. Konferensiia soŋynda barlyq ūsynys-pıkırler sarapqa salyndy. Olardyŋ köpşılıgı būiyrsa, bolaşaqta elordadaǧy su tartu, sudy tazalau jūmystaryna qoldanylatyn bolady.
Meŋdolla ŞAMŪRATOV
