«Astana – taza qala!» atty jalpyqalalyq senbılıkke Esıl audany tūrǧyndary belsene qatysty. Tört jüzden astam mekeme men ūiym qyzmetkerlerı, studentter men türlı kompaniia ökılderı – barlyǧy jiyrma myŋǧa juyq adam köşet otyrǧyzyp, aimaqtardy sypyryp, qoqystardy tazalady.
Aldyn ala belgılengen segız aimaqta 120 tehnika, sonyŋ ışınde 90 jük avtokölıgı, otyz şaqty jük tiegış kölık te jalpy ortaq ıske jūmyldyryldy. Eŋbekşıler köşesınen bastap Nūra özenı aumaǧyna deiıngı aralyqqa 661 tüp otyrǧyzu josparlanǧan eken. Būl jūmystardy Prezident Äkımşılıgı, Premer-ministr keŋsesı qyzmetkerlerı, QR Joǧarǧy Soty sudialary, QR Parlamentınıŋ deputattary jäne «Nūr Otan» partiiasy Ortalyq apparatynyŋ ökılderı atqardy.
Al «Han Şatyr» SOO aumaǧynda 330 tüp jas tal egıldı. Ony Esep komitetınıŋ, QR Konstitusiialyq Keŋesı, Esıl audany boiynşa Memlekettık kırıs basqarmasynyŋ qyzmetkerlerımen bırge akterler, sazgerler men telejürgızuşıler qolǧa aldy. Sondai-aq, senbılık aiasynda Esıl audany aumaǧyndaǧy balabaqşalarǧa bırneşe aǧaş türı tegın taratyldy. Şamamen ekı myŋǧa juyq tal-terek türı būiyrtsa, balalardyŋ bal mekenın jasyl jelekke oraityn bolady. Esıl audanynda qazırgı uaqytta 25 balabaqşa bar eken.
– Būdan būryn, dälırek aitqanda, 12 qyrküiek künı jalpy ekologiialyq ailyq bastalǧan bolatyn. Osy ailyq aiasynda 17-18 qyrküiek künı Esıl audany aumaǧynda keŋeitılgen kommunaldyq senbılık ötkızılgen edı. Oǧan jüzden astam mekeme qatysty. Onyŋ ışınde PİK-ter, Esıl audany äkımdıgınıŋ merdıgerlık ūiymdary, qūrylys kompaniialary, Kommunaldyq şaruaşylyq basqarmasynyŋ merdıgerlerı, Energetika, Qūrylys basqarmasy, «Astana Teplotranzit» AQ, «Astana su arnasy» MKK-y qyzmetkerlerı men şaǧyn jäne orta biznes ökılderı qatysqan edı. Ekı kün boiy atqarylǧan jūmystarǧa 80 arnaiy tehnika tartyldy. Sonyŋ nätijesınde abattandyru tärtıbın būzǧan keibır jaǧdailar retke keltırılıp, ülken aumaqtaǧy aramşöpter otaldy. Zaŋsyz qoqys tögılgen jerler anyqtalyp, olar arnaiy qoqys tögetın oryndarǧa äketıldı. Kommunaldyq senbılık nätijesınde qoqys tögetın poligonǧa 531 tonna qoqys şyǧarylǧan bolatyn. Jalpy köktem bastalǧaly künı bügınge deiın qūrylys qaldyqtary men tūrmystyq qoqys tögılgen 115 oryn anyqtalyp, tügel tazalanyp, qalpyna keltırıldı. Mūndai jerler «Gazmaşarmatura», «Prigorodnyi», «Telman» tūrǧyn üi alaby men Qorǧaljyn tas joly, «Jaǧalau-3» tūrǧyn üi keşenı jäne taǧy basqa jaqtardan tabyldy. Ol jerlerdıŋ barlyǧy talapqa sai abattandyryldy, – deidı Esıl audany äkımdıgınıŋ baspasöz hatşysy Jamal Äbıkenova.
Meŋdolla NŪRYMŪLY
