Elordada «Taza Qazaqstan» aksiiasynyŋ «Kielı meken» aptalyǧy aiasynda eskertkışter men tarihi ǧimarattardy jäne aumaǧyn tazalau jūmystary jürgızıldı.
Akademik Qanyş Sätbaevtyŋ biık tūǧyry Astanaǧa sän berıp tūr. «Menıŋ halqym menen de biık» degen söz maŋdaişasyna jazylǧan eskertkış maŋyna mäslihat deputattary, memlekettık qyzmetşıler, mädeni mekeme mamandary, jas sarbazdar jäne volonterler jinaldy. Maqsat – eskertkış aumaǧynda tazalau jūmystaryn jürgızu.
Mädeniet basqarmasy ūiymdastyru bölımınıŋ basşysy Saltanat Mūqsimovanyŋ sözınşe, 15-21 säuır aralyǧynda «Kielı meken» aptalyǧy aiasynda tarihi oryndardy tazalau jäne jinau jūmystary jürgızıledı. Q.Sätbaev eskertkışıne 100-ge juyq adam kelıp, tazalyq aksiiasyna dem berdı.
– Muzykalyq jas körermender teatrynan 20 ärıptesımmen bırge kelıp, qazaq ǧylymynyŋ negızın qalauşy Qanyş Sätbaevtyŋ eskertkışın juu jäne maŋyn tazalau jūmystaryna atsalystyq. Tarihi oryndardy qūrmetteudıŋ bır körınısı taza ūstaudan körınedı. Mūndai igılıktı ıske jastardy da tartu maŋyzdy. Is-şaraǧa volonterler men sarbazdardyŋ qatysqany quantty, – dedı teatr direktory Ashat Maemirov.
Jastar jürgen jer energiiaǧa toly bolmai ma?! Äsırese jas sarbazdar Sätbaev eskertkışın boi jetken jerıne deiın juyp, jasyl jelektı tyrmalap, ıske serpın berdı. Halyq qalaulylary da tazalyq jūmysyna dem berdı.
– Deputattar halyqpen bırge igılıktıŋ ısterdıŋ ortasynda jüruı kerek. Ärıptesterımmen bırge «Kielı meken» aptalyǧyna arnaiy keldık. Biyl 125 jyldyq mereitoiy atalyp ötetın Qanyş Sätbaev ūlttyq ǧylymnyŋ negızın qalap, damuyna küş saldy. Qalamyzda tarihi tūlǧaǧa laiyqty eskertkıştıŋ boi kötergenı – qūptarlyq jait. Endı eskertkıştı öz qalpynda saqtau üşın tūraqty tazalau jūmystaryn atqaryp, jastardyŋ boiyna akademiktıŋ tanym-taǧylymyn sıŋıru maŋyzdy, – dedı Astana qalasy mäslihatynyŋ deputaty Nūrlan Öteşev.
Odan bölek, №6 mamandandyrylǧan ört söndıru beketınıŋ aumaǧynda erlıkpen qaza tapqan astanalyq ört söndıruşı Asqar Zabikulin eskertkışı maŋynda qala tūrǧyndary tazalau jūmystaryn jürgızdı.
Mädeniet basqarmasynyŋ ökılı Saltanat Mūqsimova eskertkışterdı juu jäne tazalaudy mamandandyrylǧan mekemeler arnaiy tehnikamen kelıp jürgızedı dedı. Äzırge aptalyq aiasynda tazalau, jinau jūmystaryna män berılude.
