Elordada älı de päterlerınıŋ ışınde peş jaǧyp otyrǧan köpqabatty eskı üiler bar. Därethanalary köşede ornalasqan mūndai tozyǧy jetken üilerdıŋ tūrǧyndary qala, audan basşylarymen kezdesken saiyn būl baspanalardyŋ qaşan sürıletının sūraumen älek.
Astana äkımınıŋ mälımdeuınşe, biyl osyndai 300 otbasy eskırgen jäne apatty üilerden köşırıledı.
– Bız qala tūrǧyndarynyŋ tūrǧyn üi jaǧdaiyn jaqsartu üşın jūmys ıstep jatyrmyz. Būl – äleumettık päterlerdıŋ qūrylysy, qoljetımdı jeŋıldıktı tūrǧyn üi baǧdarlamalarynyŋ ıske qosyluy, tūrǧyn üi keşenderın jöndeu jäne qūrylysy ūzaqqa sozylǧan nysandardyŋ jūmysyn aiaqtau. Bıraq jūmystyŋ taǧy bır bölıgı bar – tozyǧy jetken apatty üilerdı būzu. Peş päterlerdıŋ ışınde, al därethana köşede ornalasqan köpqabatty mūndai üilerdıŋ fizikalyq tozuyna bailanysty şatyr aǧyp, ırgetas sögıle bastaidy, elektr symdary, kärız problemalary tuyndaidy, – dedı Altai Kölgınov.
Qala basşysy ekı apatty üidıŋ tūrǧyndarymen kezdestı. Aituynşa, olardyŋ bırı – Saryarqa audanyndaǧy Dükenūly, 21 mekenjaiynda ornalasqan bes qabatty jataqhana. Būl jataqhana biyl būzylady.
– Ugolnaia köşesı, 12 A, Baiqoŋyr audanyndaǧy qazırgı äl-Farabi daŋǧyly, 27-üidıŋ boiynda ornalasqan apatty üi tūrǧyndarymen kezdestım. Üidıŋ tozuy 75 paiyzdy qūraidy. Üi apatty dep tanyldy, sonymen qatar būzu tızımıne engızılgen. Tūrǧyndarǧa barlyq qūjattardy retke keltıru qajet, – dedı elorda äkımı.
Soŋǧy üş jylda apatty üilerden 700-ge juyq otbasy qonys audarǧan. Soŋǧy kezderı jeŋıldıkpen berıletın qoljetımdı tūrǧyn üi qūrylysynyŋ kölemı aitarlyqtai östı.
