Astanada «WorldSkills Kazakhstan 2022» käsıbi şeberlıktıŋ VII respublikalyq chempionaty bastaldy. Is-şaranyŋ aşylu saltanaty E.Rahmadiev atyndaǧy Memlekettık akademiialyq filarmoniiada öttı. Studentterdıŋ käsıbi şeberlıgı synalatyn saiys Oqu-aǧartu ministrlıgı men Talap kommersiialyq emes aksionerlık qoǧamynyŋ bastamasymen qolǧa alyndy.
Bes künge sozylatyn tartysty saiysqa elımızdıŋ barlyq öŋırınen 22 jasqa deiıngı 500-den astam jas maman qatysady. WorldSkills-tıŋ 30 resmi qūzyretı boiynşa baq synaidy. Qatysuşylardy 500-den astam sarapşy baǧalaidy.
Jyl saiyn dästürlı türde ötetın baiqaudyŋ aşylu saltanatyna Oqu-aǧartu vise-ministrı Ǧani Beisembaev qatysyp, elımızdıŋ tükpır-tükpırınen kelgen qatysuşylarǧa sättılık tıledı.
«WorldSkills Kazakhstan 2022» respublikalyq käsıbi şeberlık chempionaty – jas kadrlardy ekonomikanyŋ öndırıstık sektoryna tartuǧa jäne eldegı tehnikalyq jäne käsıptık bılım berudı damytuǧa yqpal etetın aituly joba. Jastardy käsıpke baǧdarlaudy maqsat etken būl baiqauǧa mektep oquşylary, kolledj jäne joǧary oqu oryndarynyŋ studentterı qatysady. Olar «Kırpış qalau», «Santehnika jäne jylytu», «Keskındeme jäne sändık jūmystar», «Bizneske arnalǧan IT şeşımder», «Veb-tehnologiialar», «Jelılık jäne jüielık basqaru», «Grafikalyq dizain», «Vizualdy sauda» sekıldı bırqatar baǧyttar boiynşa synalady. Odan bölek memlekettık organdardyŋ, äleumettık serıktestıkterdıŋ ökılderı, käsıporyn qyzmetkerlerı men tehnikalyq jäne käsıptık bılım beru ūiymdarynyŋ pedagogtary de qatysyp, täjıribe almasady.
Däl osy saiysta üzdık dep tanylyp, top jarǧan şeberler Qazaqstan qūramasynyŋ namysyn «EuroSkills 2023» halyqaralyq chempionatynda qorǧaidy.
Chempionattyŋ jarys bölımı «EKSPO» halyqaralyq körme ortalyǧy men Astanadaǧy 3 kolledjdıŋ alaŋynda ötedı dep josparlanuda.
Baiqaudyŋ qorytyndysy boiynşa jeŋımpazdar 2022 jyldyŋ 11 jeltoqsanynda QAZAQSTAN Ortalyq konsert zalynda ötetın jabylu saltanatynda marapattalady.
