Keşe Astana äkımınıŋ orynbasary Asqar Ämrin men elordalyq basqarmalar ökılderı şahar tūrǧyndarymen kezdestı. «Nūr Otan» partiiasy qalalyq filialynyŋ ǧimaratynda ötken būl ıs-şara «Sūraq-jauap» formatynda ūiymdastyryldy.
– Kezdesudıŋ tiımdılıgın arttyru üşın bız byltyrdan bastap osyndai formatqa köştık. Iаǧni sūraq qoiuǧa kelgen qala tūrǧyny öz mäselesıne qatysty basqarma ökılımen jüzbe-jüz kezdese alady. Bügıngı jiynǧa Qūrylys jäne tūrǧyn üi saiasaty, Jūmyspen qamtu, eŋbek jäne äleumettık qorǧau, Bılım, Qoǧamdyq densaulyq saqtau, Kölık jäne jol-kölık infraqūrylymyn damytu, Aktivter jäne memlekettık satyp alu sekıldı qala tırşılıgıne jauapty basqarmalardyŋ ökılderı qatysuda, – deidı «Nūr Otan» partiiasy qalalyq filialy töraǧasynyŋ bırınşı orynbasary Baqyt Saparov.
Kezdesuge kelgen jūrtşylyqtyŋ ışınde köpbalaly analar tarapynan sūraqtar jiı qoiyldy. Mäselen, özın Esenkül Töleeva dep tanystyrǧan tūrǧyn 2008 jyly üi alu üşın kezekke 5383-ınşı bolyp tırkelgenın, sodan berı on jyldan asa uaqyt ötse de, 1329-ynşy orynǧa endı ǧana jyljyǧanyn aitady. Bügınde bes balasymen bırge aiyna 110 myŋ teŋgege päter jaldap tūratyn Danagül Kätkenova da «Tegın päter sūramaimyz. Jaldamaly tūrǧyn üilerdı alǧaşqy tölemsız räsımdeitındei jaǧdai joq pa bızge?» dep janaiqaiyn jetkızdı. Qazırgı taŋda Astana qalasy boiynşa üi aluǧa kezekte 9320 köpbalaly ana tūr eken.
Sondai-aq tūrǧyndar jyljymaityn mülıktı jekeşelendıru, şaǧyn jäne orta biznes, mügedektıkke ötu sekıldı mäseleler boiynşa öz saualdaryn qoiyp, tiıstı organdardyŋ jauabyn aldy.
