Merekeler mäzırı qandai bolmaq?
Otan qorǧauşylar künı men Jeŋıs merekesıne orai elordada auqymdy şaralar ötedı. Būl turaly keşe Astana qalasy Işkı saiasat basqarmasynyŋ ūiymdastyruymen ötken baspasöz mäslihatynda aityldy.
Jiyndy aşqan qalalyq ışkı saiasat basqarmasynyŋ basşysy Baqyt Esımova Otan qorǧauşylar merekesı men Jeŋıstıŋ 70 jyldyǧyna orai elımızde ötkızıletın şaralardyŋ bastysy Astanada ūiymdastyrylatynyn, sonyŋ ışınde memlekettık maŋyzdy oqiǧalar qūrmetıne sap tüzeitın äskeri şerudı erekşe atap ötetının jetkızdı. Alaida, «Qazaq elı» monumentı aldynda bastalatyn äskeri paradqa jūrtşylyq arnaiy şaqyru biletımen ǧana kıre alady. Öitkenı, ondaǧy oryndar şekteulı. Esesıne, äskeri şerudı tıkelei efir arqyly üiden tamaşalauǧa bolady. Elımızdıŋ basty telearnalary osyǧan jūmylyp otyr» deidı Baqyt Esımova.
Işkı saiasat basqarmasynyŋ basşysy 7 mamyr künı tüste Elbasynyŋ qatysuymen general-maior İvan Panfilovtyŋ eskertkışın aşu josparlanyp otyrǧanyn da aita kettı.
Būdan keiın Mädeniet basqarmasy basşysynyŋ orynbasary Narima Mūhambetalina söz alyp, mereke künderı Astanada 50-den astam şara ötkızıletının habarlady. Negızgı merekeler «Qazaq elı» men «Bäiterek»monumentterı alaŋynda, «Qazaqstan» sport keşenı janyndaǧy Studentter saiabaǧynda, qalalyq äkımdık alaŋy men Jastar saraiynyŋ aldynda ūiymdastyrylady. Barlyq alaŋda konserttık baǧdarlamalar ötıp, elordalyq şyǧarmaşylyq ūjymdarmen qatar, Roza Rymbaeva, Älıbek Dınışev, Sergei Zaharov, Rinat İbragimov syndy änşıler öner körsetedı.
8 mamyr «Otan qorǧauşylar» alaŋy men qalanyŋ ortalyq ziratyna gülşoqtaryn qoiumen bastalmaq. Būǧan qosa, 9 mamyr künı ötetın änşı Aigül İmanbaevanyŋ «Kütken kün» keşı men opera änşısı Mariia Mudriaktyŋ operalyq konsertın atap ötuge bolady.
Baspasöz mäslihatyna qatysqan qalalyq Jūmyspen qamtu jäne äleumettık baǧdarlamalar basqarmasy basşysynyŋ orynbasary Meiırlan Narynbetov äskeri merekelerdıŋ basty keiıpkerlerı – soǧys ardagerlerıne körsetılıp jatqan äleumettık kömekter jönınde äŋgımeledı. Bügınde Astana qalasynda 206 soǧys aragerı bolsa, sonyŋ 49-y – maidannan mügedek bolyp oralǧandar. Otan üşın ot keşken qariialardyŋ bärı baspanamen qamtamasyz etılgen. Elordaǧa soŋynan qonys audarǧan 6 ardagerge jaqynda päter kıltı tapsyrylǧan. Endı arnaiy komissiia qūrylyp, ardagerlerdıŋ üiıne jöndeu jūmystaryn jürgızu qolǧa alynypty. Meiırlan Ädılǧazyūlynyŋ aituynşa, būl şarualar jyl aiaǧyna deiın aiaqtalady.
– Respublikalyq jäne jergılıktı biudjet esebınen mereke qūrmetıne orai ardagerlerge bölıngen qarajat tügelımen olardyŋ qolyna tidı. Ardagerlerdıŋ äskeri şeruge kiıp şyǧatyn bıryŋǧai kiımı de äzır. Özderıŋızge belgılı, Mäskeude ötetın paradqa Qazaqstannan 6 soǧys ardagerı barady, sonyŋ bıreuı – Ahat Bekmädi Astanadan. Ardagermen bırge qaladaǧy ortalyq klinikalyq gospitaldyŋ bas därıgerı Ädılhan Abdulin erıp barady, – deidı Meiırlan Narynbetov.
Jeŋıstıŋ 70 jyldyǧyna orai elordadan 4812 adam mereitoilyq medalge ūsynylyp otyr eken.
Qymbat TOQTAMŪRAT