Bügıngı taŋda Astana qalasynda jiyrma tört ūlttyq-mädeni ortalyq qoiyn-qoltyq jūmys ısteude. Olardyŋ barlyǧyna da özderınıŋ ana tılın, tarihyn oqyp-üirenıp, ūlttyq mädenietı men ädet-ǧūrpyn, salt-dästürın damytuǧa jan-jaqty jaǧdailar jasalǧan.
Qazaqstan halqynyŋ bırlıgı merekesı qarsaŋynda tübı bır, tamyry ortaq türık aǧaiyndardyŋ «Ahyska» etno-mädeni ortalyǧynyŋ jūmysymen tanystyq.
Etno-mädeni ortalyq töraǧasy Asker Pirievtıŋ aituynşa, el täuelsızdıgınıŋ alǧaşqy jyldarynan bastap qūrylǧan mädeni ortalyqtyŋ qazır täjıribesı molaiyp, basqa da qoǧamdyq ūiymdarmen qarym-qatynasy nyǧaiǧan. Biyl Elbasynyŋ Jarlyǧymen Qazaq handyǧynyŋ 550 jyldyǧy, Ūly Otan soǧysyndaǧy Jeŋıstıŋ 70 jyldyǧy, Konstitusiianyŋ jäne Qazaqstan halqy assambleiasynyŋ 20 jyldyǧy merekelenedı. Osyǧan bailanysty olar halyqty bırlıkke, tatulyqqa, dostyqqa ündeitın ıs-şaralar ötkızıp, Jeŋıs künı merekesıne daiyndyq jürgızıp jatqan körınedı.
Elımızde türık diasporasy ökılderınıŋ basym köpşılıgı qazaq tılınde söilese, elordada da qazaq mektebınde oqityn türık balalarynyŋ qatary jyldan-jylǧa artyp keledı.
– Bız qazaq tılın – özımızdıŋ ekınşı ana tılımız sanap, qūrmetteimız. «Ahyska» etno-mädeni ortalyǧynyŋ elu müşesınıŋ köbı memlekettık tıldı erkın meŋgergen. Jastar jaǧy arnauly kurstarǧa baryp üirenıp te jür. Şetelden Qazaqstanǧa jūmys saparymen keletın türık käsıpkerlerı arasynda da qazaqşa söileitınder öte köp. Rasy kerek, Qazaqstan eşkımge qazaq tılın üiren dep, zorlap talap qoimaidy. Degenmen, osy eldıŋ suyn ışıp, dämın tatyp jürgesın tılın de bılu mındet dep sanaimyz. Jerınıŋ keŋdıgı siiaqty qazaq halqynyŋ jüregı de keŋ. Qandai ūlt ökılı bolmasyn mūnda özın erkın sezınedı, būǧan bärımız kuämız, – deidı Asker Allaberdıūly.
«Ahyska» etno-mädeni ortalyǧy Beibıtşılık jäne kelısım saraiynda ornalasqan. Olar qalanyŋ qoǧamdyq ömırıne belsene qatysady. «Qazaqstan halqy – bırtūtas otbasynda», «Qazaqstanym – qara şaŋyraǧym» siiaqty türlı festivalder ötkızıp, qarttar men balalar üilerıne baryp konsertter berıp tūrady. Halyqaralyq turnirler men qoǧamdyq-saiasi aksiialardan da tys qalmaidy. Sondaǧy negızgı maqsat – eldegı süttei ūiyǧan bereke men bırlıktı nasihattau, halyqtyŋ tausylmas qazynasy – tatulyqty ülgı etu.
Taŋatar TÖLEUǦALİEV
