«Maidan änderı»
Jaqynda Ūly Jeŋıstıŋ 70 jyldyǧyna orai Q.Quanyşbaev atyndaǧy Memlekettık akademiialyq qazaq muzykalyq drama teatrynda Astana qalasy Tılderdı damytu basqarmasynyŋ qoldauymen «Maidan änderı» atty monospektakldıŋ premerasy boldy.
Şyǧarma avtory – jazuşy Rollan Seisenbaev. Monospektakldegı keiıpkerlerdı bastan-aiaq somdap şyǧatyn Qazaqstannyŋ halyq artisı – Tılektes Meiramov. Qoiuşy rejisser – Ūlpan Serıkbolqyzy.
Spektakldegı bas keiıpker Sadyr Baibarysov – sūrapyl soǧystan aman kelgen soldat. Soǧystan oralǧan soŋ bır mekemenıŋ revizory bolyp, otyz jyldai qyzmet atqarady. Toi-tomalaqta, basqosularda araq ışudı onşa terıs körmeidı. Işıp alsa, ūrys dalasynda salǧan änderın aitady. Tüsınde de köretını – soǧys, oq boraǧan sūrapyl künder. Oqqa ūşqan dosy, jaraly orys qyzyn bır tün arqalap jürgenı ömırı esınen ketpeidı. Sosyn ışedı, än salady… Bır saǧat boiy osyndai auyr taǧdyr iesınıŋ obrazyna kırıp, körermendı küldıretın jerde küldırıp, jylatatyn jerde jylatqan Halyq artisı Tılektes Meiramov: «Qazır, ökınışke qarai, ardagerlerımızdı Jeŋıs künı ǧana eske alamyz. Qalǧan künderı nazardan tys qalyp jatady. Menıŋ äkem de soǧysqa qatysqan, sol soǧystyŋ zardabynan 63 jasynda qaitys boldy. Men sol soǧysqa qatysqan ardagerler, äkem men özımnıŋ balalarymnyŋ, nemerelerımnıŋ arasyndaǧy däneker siiaqtymyn. Äkem körgen azapty balalaryma, nemerelerıme tüsındıre alsam, paryzym oryndaldy dep esepteimın» dep Ūly Otan soǧysynyŋ ardagerlerıne degen qūrmetın bıldırdı.
Yrysbek DÄBEI