«Naz» memlekettık bi teatry elordanyŋ 20 jyldyǧyna orai Qostanai jäne Qaraǧandy oblystarynda ötken Astana künderıne qatysty.
Ekı qalanyŋ da mädeniet saraiy körermenge lyq toldy. Tobyldyŋ törın, Nūranyŋ boiyn än men bige bölegen beinebır öner köşı dersıŋ. Elordanyŋ qūrylǧannan bergı damu tarihyn arqau etken konserttık baǧdarlamany kışıgırım horeografiialyq qoiylym dese de bolady. Abyzdardyŋ sözımen bastalyp, ör ruhty qazaqtyŋ jıgıtterınıŋ biımen jalǧasyn tapqan keş körgen adamnyŋ ruhyn köterıp, bır sät küibeŋ tırlıkten alystatty. Sıltıdei tynǧan körermendı bi älemı özıne baurap aldy.
Teatr ärtısterınıŋ tolassyz eŋbegınıŋ nätijesınde daiyn bolǧan baǧdarlamada eŋ taŋdauly horeografiialyq kompozisiialar men biler jäne Astana, Otan jaily poetikalyq qoiylymdar körsetıldı.
Körermenge osyndai ǧajaiyp konserttık baǧdarlama ūsynǧan teatrdyŋ körkemdık jetekşısı – bas baletmeister, QR eŋbek sıŋırgen qairatkerı Qadişa Aǧymbaeva.
Qostanai qalasynyŋ äkımı Bazyl Jaqypov jäne Qaraǧandy qalasynyŋ basşysy Nūrlan Äubäkırov keşke qatysyp, ärtısterge rizaşylyǧyn bıldırdı.
«Naz» memlekettık bi teatrynyŋ būl konsertterde Astananyŋ aibynyn asqaqtatty.
Ainūr ŞÄMŞI
Gülzat MAQSATQYZY, Qaraǧandy:
– «Naz» bi teatry keledı degendı estıgen künnen bastap būl kündı asyǧa küttım. Özım büldırşınderdı bi önerıne baulimyn. Konserttı köre otyryp, özıme köp täjıribe jinaqtap, köp oi tüidım. Qanşama bi ūjymdaryn ǧalamtordan körıp, ızdenıste jüremın. Bıraq būl keşten alǧan taǧylymym maǧan şabyt syilady. Osyndai ūjymdar qalamyzǧa jiı kelıp tūrsa eken. Teatrǧa tek tolaǧai tabystar tıleimın. Astanamyzdy mereitoiymen qūttyqtaimyn!
Aiman SAILAUQYZY, Qostanai:
– Mūndai konserttı telearnalardan jiı köre almaisyz. Zeinette otyrǧan soŋ, kök jäşıktı köbırek köretınımız jasyryn emes. Jas ūlǧaiǧan soŋ öz qazaǧyŋnyŋ ūlttyq dünielerın ızdeidı ekensıŋ. Şynymdy aitaiyn, mūndai joǧary deŋgeidegı bi ūjymynyŋ konsertın soŋǧy ret qaşan körgenım esımde joq. Būl konsert tek ädemı bi qimyldarynan ǧana tūrmaidy eken. Är bi özınşe tereŋ tüsınık, tūrmys-salttan habar beredı. Ūlttyq kiımderı qandai tamaşa! Köz süisınedı. Būl teatrǧa tek şyǧarmaşylyq tabys tıleimın!
