Keşe Täuelsızdık saraiynda jaŋa merzımge sailanǧan QR prezidentın ūlyqtau räsımı öttı. Saltanatty räsımde Nūrsūltan Äbışūly Nazarbaev Qazaqstannyŋ prezidentı retınde ant qabyldap, qyzmetıne resmi türde qaita kırıstı.
Ūlyqtau saltanaty – qūrmet räsımı
Būl – Täuelsız Qazaqstan tarihyndaǧy besınşı ūlyqtau räsımı. Elımızdıŋ Tūŋǧyş Prezidentı 1991 jyly alǧaş ret ant bergen bolatyn. Ol saltanatty räsım 10 jeltoqsanda Almatydaǧy Respublika saraiynda öttı.
1999 jyly 10 qaŋtarda ötken ekınşı jalpyhalyqtyq sailauda da jeŋıske jetken Nūrsūltan Nazarbaev Qazaqstan Respublikasynyŋ Konstitusiiasyna alaqanyn qoiyp, ant bergen edı.
Būdan keiın 2005 jylǧy 4 jeltoqsanda üşınşı jalpy halyqtyq sailau öttı. El senımın arqalaǧan Elbasyn ūlyqtau saltanaty 2006 jylǧy 11 qaŋtarda Aqordada boldy. Būl inaugurasiiaǧa älemnıŋ 70-ten asa memleketınen kelgen joǧary lauazymdy tūlǧalar qatysty.
Osydan keiın 2011 jyly kezekten tys sailauda taǧy da Nūrsūltan Äbışūly jeŋıske jettı. Ūlyqtau räsımı 8 säuırde öttı.
Endı, mıne, QR Ortalyq sailau komissiiasynyŋ 28 säuırde jariialaǧan soŋǧy qorytyndysy boiynşa kezektı sailauda ıs basyndaǧy Elbasy Qazaqstan halqynyŋ 97,75 paiyz dauysyn jinap, jeŋıske jetıp, besınşı märte el Prezidentı retınde ant qabyldap otyr.
Bütın bır halyqtyŋ öz prezidentın sailauy jäne el sengen Elbasynyŋ resmi türde qyzmetke kırısuı – tarihi uaqiǧa, saltanatty sät.
Ūlyqtau räsımı ötetın Täuelsızdık saraiyna eŋ aldymen Qazaqstan Respublikasynyŋ Tuy, ştandarty men Konstitusiiasy jetkızıldı. Būdan keiın prezident mıngen saltanatty kortej Aqordadan şyǧyp, räsım ötetın ǧimaratqa qarai bet aldy. Täuelsızdık saraiynyŋ aldynda jaŋadan sailanǧan Qazaqstan Respublikasy Prezidentıne Memlekettık küzet qyzmetınıŋ bastyǧy Amantai Küreŋbekov raport berdı. Būdan keiın artilleriialyq ot şaşu bolyp, Nūrsūltan Nazarbaev saltanatty räsım ötetın zalǧa qarai bet aldy.
Prezident kırgennen keiın Konstitusiialyq keŋes töraǧasy İgor Rogov Konstitusiianyŋ 42-babyna säikes, Qazaqstan Respublikasynyŋ Prezidentı halyqqa ant bergen sätten bastap lauazymyna kırısetının mälımdedı. Sodan keiın Prezident Nūrsūltan Nazarbaev Qazaqstan Respublikasynyŋ Konstitusiiasyna oŋ qolyn qoiyp tūryp, «Qazaqstan halqyna adal qyzmet etuge, Qazaqstan Respublikasynyŋ Konstitusiiasy men zaŋdaryn qataŋ saqtauǧa, azamattardyŋ qūqylary men bostandyqtaryna kepildik beruge, Qazaqstan Respublikasy Prezidentiniŋ özime jüktelgen märtebeli mindetin adal atqaruǧa saltanatty türde ant etemin» dep halyqqa ant berdı.
Memleket basşysyn ūlyqtau räsımınıŋ qūrmetıne Änūran aitylyp, zeŋbırekterden 21 ret oq atyldy.
Būdan keiın Ortalyq sailau komissiiasynyŋ töraǧasy Quandyq Tūrǧanqūlov Nūrsūltan Nazarbaevqa Qazaqstan Respublikasy prezidentınıŋ kuälıgın tabys ettı.
El bırlıgın körsetken erekşe sät
Ūlyqtau räsımınde söz söilegen Elbasy Nūrsūltan Nazarbaev kezekten tys ötken prezident sailauy Qazaqstan halqynyŋ bırlıgın küllı älemge tanytqanyn atap öttı.
– 26 säuır elımız üşın taǧy bır tarihi taǧdyrly kün boldy. Prezident sailauy Qazaqstan halqynyŋ kemeŋgerlıgın bükıl älemge paş ettı. El bırlıgıne berıktıgı men kemel keleşekke senımın tanytty. Mäŋgılık eldıŋ myzǧymas ūstanymdaryna adaldyǧyn körsettı. Būl – taŋdau jarqyn bolaşaqqa qadam basqan Qazaqstannyŋ taŋdauy, bırlıgın berekege ūlastyryp, ūly ıster jolynda ūiysqan barşa halyqtyŋ joly. Öz ūrpaǧynyŋ bolaşaǧyn qasiettı Otanymyz – Qazaqstanmen bırge köretın ärbır azamattyŋ erık-jıgerı, – dedı Elbasy.
Prezident bügıngı mereilı sätte özıne berılgen senım mandaty memleketımızdı nyǧaitu jolyndaǧy qyruar ısterdıŋ baǧasy ekenın basa aitty.
«Būl – Qazaqstandy eŋ quatty elderdıŋ qataryna qosudy közdeitın ūly maqsatqa berılgen halqymnyŋ aq batasy! «Mäŋgılık el» ūlttyq ideiasy men «Qazaqstan 2050» strategiiasyna, «Nūrly jol» baǧdarlamasy men «Bes halyqtyq reformaǧa» elımnıŋ bıldırgen qoldauy. Ömırın halqynyŋ baqyty jolyna arnaǧan janǧa būdan zor qūrmet bolmaidy. Men üşın el senımınen asqan märtebe joq, sol senımdı aqtaudan artyq baqyt joq. Sol sebeptı, men Qazaqstannyŋ jarqyn bolaşaǧy jolynda qandai täuekelge de daiynmyn» dedı ol.
Aldaǧy mındet auqymdy
Memleket basşysy eldıŋ äl-auqatyn jaqsartyp, ekonomikany ärı qarai damytu jolynda bes ülken mındet tūrǧanyn aitty. Onyŋ bırınşısı – tūraqty qoǧamnyŋ negızı retınde orta tapty damytu. Memleketımızde ortaşa tabysty halyqtyŋ köbeiuıne erekşe den qoiyp, käsıpkerlıktı örkendetu kerek.
Ekınşı, bıryŋǧai ışkı naryqty damytudy qolǧa alyp, barlyq öŋırdıŋ bırdei örkendeuın qamtamasyz etu qajet.
Üşınşı maŋyzdy mındet – sybailas jemqorlyqpen küresu. Törtınşı, jaŋa jūmys oryndaryn qūru. Osy maqsatta qolǧa alynǧan industriialyq baǧdarlamalar jalǧasuy tiıs. Besınşı, jaŋa tarih belesınde ūlt bırlıgın nyǧaita tüsu qajet.
Qaaqstan Prezidentı memlekettıŋ ornyqty damuyna baǧyttalǧan bes bırdei reformalardyŋ oryndaluy üşın halyqtyŋ küş-jıgerı jūmyldyryluy kerektıgın atap öttı. Elımız üşın maŋyzdy reformalarǧa airyqşa nazar audarylyp, būl mındetterdıŋ kezeŋ-kezeŋımen jüzege asyryluyn baqylaityn QR Prezidentınıŋ janynan Jaŋǧyrtu jönındegı ūlttyq komissiia qūrylmaq. Ūlttyq komissiia qūramynda bedeldı şeteldık jäne qazaqstandyq sarapşylary bar halyqaralyq konsultativtık keŋes jūmys ıstemekşı. Elbasynyŋ aituynşa, osy komissiianyŋ alǧaşqy otyrysynda «Memleket qūru ısındegı 100 naqty qadam» atty ūlt jospary tanystyrylady.
– «100 qadam» – bızdıŋ jahandyq jäne ışkı syn-qaterlerge qarsy jauabymyz, sonymen bırge, damyǧan otyz memlekettıŋ qataryna jaŋa tarihi jaǧdailarda qosylu jönındegı jospar, – dedı Prezident. Sondyqtan, Qazaqstannyŋ jaŋǧyrtyluyn barşa jūrtqa ortaq ıs retınde qarap, būl mındetterdı jüzege asyruǧa barşa qazaqstandyq belsene atsalysuy tiıs.
Bız damudyŋ daŋǧylyna tyŋ qarqynmen aiaq basamyz. «5 halyqtyq reformany» tabysty jüzege asyryp, bolaşaǧy bırtūtas elge ainalamyz. HHI ǧasyr – bırlık pen dostyqtyŋ quatymen ozatyn ǧasyr. Bız beibıtşılık pen kelısımge, tatulyq pen tūraqtylyqqa täu etıp, täube deimız. Osy qūndylyqtarymyzdyŋ qadyryna jetu arqyly Mäŋgılık el bolamyz. Sol jolda talmai eŋbek eteiık, qadırlı halqym! Qazaqstannyŋ jūldyzy joǧary, joly nūrly bolsyn! Eldıktıŋ tuy biıkte jelbırep, abyroiymyz asqaqtai bersın! Elımız aman, jūrtymyz tynyş bolsyn! – dep sözın tüiındedı Elbasy.
Būdan keiın el Prezidentı – Qazaqstan Respublikasynyŋ Joǧarǧy Bas qolbasşysy Täuelsızdık saraiy aldyndaǧy alaŋda qorǧanys ministrı İmanǧali Tasmaǧambetovtıŋ raportyn qabyldady.
Jaŋa merzımge sailanǧan Prezidenttıŋ qūrmetıne QR Qaruly küşterınıŋ saltanatty şeruı öttı.
Qymbat TOQTAMŪRAT
