Elordada 8 qyrküiek pen 8 qazan aralyǧynda qala aumaǧyn sanitarlyq tazartu, abattandyru jäne kögaldandyru jönındegı küzgı ekologiialyq ailyq aiasynda 20 qyrküiekte jalpy qalalyq senbılık ötedı.
Osyǧan bailanysty Esıl özenı, Aqbūlaq pen Sarybūlaq özekşelerı qoqystan jäne basqa da tūrmystyq qaldyqtardan tazartylady. Saiabaqtar men şaǧyn baqtardaǧy jasyl jelekterdı kütudıŋ mausymdyq jūmystary jürgızıledı.
Qala äkımdıgınıŋ baspasöz mälımetı boiynşa, senbılıkke 4300 käsıporyn men ūiym, 47 joǧary jäne arnauly orta oqu oryny, 86 orta mektep, 131 memlekettık mekeme men ūlttyq kompaniiadan 95 myŋǧa juyq adam qatysuy josparlanǧan.
Ekologiialyq ailyq aiasynda qala aumaǧynan bırneşe myŋ tonna qoqys şyǧarylmaq. Audandyq äkımdıkter tazalyq şarasyna qatysuşylardy qajettı qūral-jabdyqtarmen, atap aitqanda, kürek, tyrnauyş, qolǧap, qoqys salatyn qaptarmen qamtamasyz etedı.
Jinalǧan qoqysty şyǧaruǧa 460 tehnika, sonyŋ ışınde 280 jük kölıgı, 180 jük tiegış jūmyldyrylady.
Eŋbek merekesınde bırneşe aumaqta ekı myŋnan astam aǧaş otyrǧyzylady. Atap aitqanda, Almaty audanynda – 2 153 aǧaş , Saryarqa audanynda – 150 aǧaş egılıp, 1000 q.m. jasyl qorşau tūrǧyzu közdelgen.
Saǧi ORAL
