Künı keşe bas qosqan besınşı şaqyrylymnyŋ halyq qalaulylary kezekten tys segızınşı sessiiasyn ötkızdı. Kün tärtıbıne jetı mäsele qoiyldy. Maŋyzdy jiynǧa qala äkımı İmanǧali Tasmaǧambetov, onyŋ orynbasarlary – A.Balaeva, E.Qojaǧapanov, Esıl audanynyŋ äkımı S.Mūstafina men Saryarqa audanynyŋ äkımı E.Ospanov, barlyq basqarma basşylary jäne qoǧamdyq bırlestık ökılderı qatysty. Deputattardyŋ denı jinalyp, qordalanǧan mäselelermen tanysyp, şeşu joldaryn qarastyrdy.
Alǧaşqy mäselenı Ekonomika jäne biudjettık josparlau basqarmasynyŋ bastyǧy Janat Nūrpeiısov ortaǧa saldy. Ol jinalǧan qauym nazaryna 2011 jylǧy 7 jeltoqsanda bekıtılgen «Astana qalasynyŋ 2012-2014 jyldarǧa arnalǧan biudjetı turaly» şeşımıne özgerıster men tolyqtyrular engızu turaly ūsynysyn mälım ettı. Jıtı daiyndalǧan ekonomikalyq saraptaudan biudjettı qaita naqtylau qajettılıgı tuyndaǧanyn tüsındık. Oǧan qaladaǧy äleumettık-ekonomikalyq örısteu men salyqtyq äkımşılendıru tetıkterınıŋ qūntty jūmys atqaruy negız bolǧan. Osy sebeptıŋ arqasynda üstımızdegı jyldyŋ qaŋtar-tamyz ailary aralyǧynda 111,5 paiyzdyq mejege jetken kırıstıŋ artyqşylyǧy aiqyndalyp otyr. Onyŋ 60 paiyzdan astamyn qosymşa qūn salyǧy men äleumettık salyq esebınen tügendelgenıne bas ekonomist basa nazar audardy. Sonymen qala kırısı 7 milliard 219,4 million somany qūrap otyr. Būl öz kezegınde biudjettı qaita eseptep, ūlǧaityp, sūranysqa ie salalarǧa qosymşa qarjy böludı qarastyruǧa mūryndyq bolǧan. Bas esepşınıŋ sözıne süiensek, bırneşe basqarma mūqtaj qarajatqa qol jetkızıp otyr. Deputattar ūsynylǧan jospar kestesımen tanysa otyryp, eşqandai saual joldamady. Eŋ köp qarajat Qarjy basqarmasyna tiesılı bolsa, eŋ azy Işkı saiasat basqarmasynyŋ enşısıne tiıptı.
Bölınıp otyrǧan qarjynyŋ esebınen İlinka auylyndaǧy 200 orynǧa arnalǧan mekteptıŋ jaŋa ǧimaraty, Almaty-Aqmeşıt köşelerınıŋ qiylysyndaǧy jaŋa balabaqşa qūrylysy, «Juravuşka» baqşasynyŋ qosymşa bölıgı salynyp bıtpek. Oŋtüstık-şyǧys yqşam audanynda jaŋa ambulatorlyq emhana qūrylysyn aiaqtau josparlanǧan. Odan bölek är salanyŋ özıne tiesılı maqsatty jūmystary jüielı türde bappen oryndala beredı.
«Ädılet» tūtynuşylar qūqyǧyn qorǧau qoǧamynyŋ töraǧasy Qabyken Zakarianovtyŋ jan jaqtan qysqan qymbatşylyqty jeŋıldetu üşın osyndai kırıstı zeinetaqyny nemese jalaqyny köbeituge jūmsauǧa, iaki qalalyq kommunaldyq tarifterdı tömendetuge bolmas pa degen saualyna Janat Nūrpeiısov qymbattauǧa qaramastan, mūndai ötınışter tek respublikalyq deŋgeide şeşıletını, sondyqtan būl saualdyŋ şeşımı äkımşılık qūzyryna tiesılı emestıgın alǧa tartty.
Kün tärtıbınde qoiylǧan maŋyzdy saualdyŋ bırı memleket qajetıne bailanysty qaitarylǧan jer telımderı turaly boldy. Bügıngı künnıŋ kezek küttırmes oqiǧasy retınde Zaŋdylyq, qūqyq tärtıbı jäne köpşılıkpen jūmys jasau mäselelerı jönındegı tūraqty komissiianyŋ töraǧasy Nikolai Meşeriakov osy taqyrypty köterdı. Būl sala boiynşa ırgelı jūmystar jasalyp jatqandyǧyn, jüzege asqan jobalar az emestıgı aitylyp, Mirzoian köşesı boiyndaǧy 10 jer telımınıŋ qojaiyny jäne qala äkımdıgınıŋ ekeuara kelısımımen memleket mūqtajdyǧy üşın satyp alynǧany turaly aqpar berdı. Kelısımge könbegen tūrǧyndar sotqa şaǧymdanu arqyly ortaq mämılege keletını baiandaldy.
Astana qalasy äkımı apparaty basşysynyŋ orynbasary Erlan Kanalimov qala basqaru täsılın özgertu turaly ūsynys-saualyn joldady.
Jūmyspen qamtu jäne äleumettık baǧdarlamalar basqarmasynyŋ bastyǧy jeŋıldıkpen därı-därmektı tegın taratu tızımderı turaly aita otyryp, osy därı ülestıru mäselesın atalmyş basqarmaǧa qaita qaitaru jönındegı ūsynysyn maqūldatty.
Işkı saiasat basqarmasy bastyǧy Bolat Tılepovtıŋ ūsynuymen Astana äkımdıgı janyndaǧy Jastar ısterı jönındegı keŋestıŋ qūramy özgerdı. Qala äkımı keŋes töraǧasy bolyp bekıtıldı. Keŋes müşelıgıne qala basşysynyŋ orynbasarlary, deputattar men jastar bırlestıkterınıŋ ökılderı sailandy. Tötenşe jaǧdailar departamentı bastyǧynyŋ orynbasary Beibıt Sadyqov jaŋa evakuasiialyq komissiianyŋ qūramyn jariialady. Käsıpkerlık jäne önerkäsıp basqarmasy bastyǧynyŋ orynbasary Rysgül Qauǧabaeva käsıpkerlık mäselelerı jönındegı saraptau keŋesınıŋ jaŋa qūramyn ūsyndy.
Sessiiaǧa töraǧalyq etken Bauyrjan İsabaev barlyq mäsele jıtı qaralyp, bırauyzdan qabyldanǧanyn mälımdedı. Deputattar tarapynan eş qarsylyq bolmady.
Şynar ÄBILDA
