Astanada bokstan äielder arasyndaǧy älem chempionaty märesıne jettı. Būrymdy boksşylardyŋ bairaqty bäsekesınde qazaq arulary 4 altyn, 2 qola medal oljalady. Komandalyq esepte Qazaqstan qūramasy bırınşı oryn ielendı. Būl – būryn bolmaǧan tolaǧai jetıstık.
«Astana Arena» sport saraiynda toǧyz künge sozylǧan dübırlı dodanyŋ aqtyq aiqastaryn eŋ jeŋıl salmaqtaǧy arular bastady. Şarşy alaŋnyŋ kök būryşyna qazaqstandyq Nazym Qyzaibai köterılgende atşaptyrym sarai ışı guıldep kettı. Olai bolatyny osydan ekı jyl būryn qazaq qyzdary arasynan tūŋǧyş bolyp älem chempiony ataǧyn jeŋıp alǧan Nazymnyŋ ekınşı ret top jaruǧa mümkındıgı paida bolǧan. Sondyqtan da janküier qauym süiıktı sportşysyn qyzu qoldauǧa kırıstı. Al şarşy alaŋdaǧy aiqasqa kelsek, qytailyq Iаn Vang bızdıŋ boksşyǧa qarsylyq körsete almady. Nazym tört raundta da basymdyq tanytyp, tamaşa jeŋıske jettı. Osylaişa Qazaqstan sportyna taǧy bır tarihi körsetkış qosyldy. Nazym Qyzaibai – äielder boksynan älemnıŋ ekı dürkın chempiony!
Alaman jarysta Dina Jolaman esımdı aruymyz da aidy aspannan şyǧardy. 54 kelı salmaqta synǧa tüsken qazaq qyzy aqtyq aiqasta Bolgariia elınıŋ ümıtın arqalap kelgen öte täjıribelı Stoika Petrovany tıze büktırdı. Būl Qazaqstan qūramasy qorjynyna tüsken ekınşı altyn medal boldy.
Arada köp uaqyt ötpei-aq Qazaqstan janküierlerı taǧy bır quanyşqa bölendı. Būl joly 69 kelı salmaqta baq synaǧan astanalyq boksşy Valentina Halzova älem bırınşılıgınıŋ jeŋımpazy atandy. Aqtyq aiqasta Qytai qyzy Gu Hongpen qolǧap tüiıstırgen Valentina naǧyz jeŋıske degen jıger tanytty. Özınen boişaŋ qarsylasyna qarsy ūtymdy taktika taŋdai bılgen astanalyq arudyŋ jeŋısıne eşkım de kümän keltırmedı. Alaida jeŋıs taǧdyry töreşılerdıŋ qolynda ekenı belgılı ǧoi. Sondyqtan da jekpe-jek aiaqtalǧan sätten bastap janküierler «Qazaqstan», «Qazaqstan» dep dauystap jatty. Al şarşy alaŋdaǧy töreşı Valentinanyŋ qolyn kötergende keŋ sarai ışı teŋselıp ketkendei boldy. Jelbıregen tular, qūşaqtasqan janküierler… Osylaişa, Qazaqstan qūramasy qorjynyna üşınşı altyn medal tüstı. Būl da el sportynyŋ tarihyndaǧy jarqyn beles, jaŋa körsetkış boldy.
Qazaq janküierlerınıŋ jüregın tolqytqan jekpe-jektıŋ bırı älı alda edı. Eŋ auyr salmaqtaǧy aiqas. Būl synǧa taǧy bır qazaq qyzy qyzdyrynyp jatty. Ol – 2014 jylǧy älem bırınşılıgınıŋ kümıs jüldegerı astanalyq Läzzat Küngeibaeva bolatyn. Onyŋ qarsylasy amerikalyq Şadasiia Grin edı.
«Ringtıŋ kök būryşyna Läzzat Küngeibaeva şyǧady. Qazaqstan» degen dauys saŋq etkende «Barys Arena» saraiynda köterılgen dauystan qūlaq tūnǧandai boldy. Jartylai finalda özınen bır bas ūzyn ärı qaruly qytai qyzynan ailasyn asyrǧan Läzzatqa janküier qauym äbden riza bolǧan edı. Onyŋ üstıne astanalyq arudyŋ Qazaqstan qūramasy sapynda öner körsete bastaǧanyna on jyldyŋ jüzı bolyp qalǧan. Tüptep aitqanda, täjıribesı tolysqan, älem chempionatynyŋ finalyna deiın jetken boksşynyŋ endıgı maqsaty, ärine, älem bırınşılıgınıŋ altyn jüldesı bolatyny aitpasa da tüsınıktı edı.
…Küngeibaeva bırınşı raundtan-aq öte saq qimyldap, aldymen qarsylasynyŋ şabuylyn kütkendei boldy. Onysyn aldymen jaqsylap tūryp qarsy alu soqqysyn jasaudy oilastyrdy ma dep jorydyq. Şynymen de solai bolǧandai. AQŞ-tyŋ denelı aruy aitqandaiyn bırden alǧa ūmtyldy. Keregı osy degendei Läzzat Grinnıŋ sol şyqşytynan sylq etkızıp soqty da jıberdı. Taǧy bırneşe soqqysyn däl tigızgen qazaq boksşysy bırınşı raundty öz paidasyna şeştı. Bapkerlerı jaǧdaidy jetkızıp aitsa kerek, ekınşı raund bastalysymen amerikalyq boksşy taǧy da alǧa öŋmeŋdei tüstı. Läzzattyŋ da kütkenı osy edı. Bırınşı raundta esesın jıberıp alǧanyna qany qyzǧan Grin taǧy da Läzzattyŋ qarsy alǧan auyr soqqysyna tap boldy. Üşınşı kezeŋde tarazy basy teŋeskendei bolǧanymen töreşıler qazaq qyzynyŋ basymdyǧyn anyqtady. Al soŋǧy şeşuşı raundqa ekı boksşy da edäuır älsırep şyqty. Qalai degenmen 81 kelıden auyr boksşylardyŋ qimyly da, soqqylary da auyr bolatyny zaŋdylyq qoi. Jeŋılıp jatqanyn bıletın amerikalyq boksşy qanşa tyrysqanymen Läzzatqa şamasy jetpedı. «Endıgı maqsatym – älem chempiony atanu» dep özıne sert bergen qazaq boksşysy özın de, elın de ülken quanyşqa böledı.
Osylaişa älem chempionatynyŋ finalynda Qazaqstan tuy törtınşı ret biıkten jelbırep, qalyŋ janküier qazaq elınıŋ änūranyn şyrqady.
Osy chempionattaǧy taǧy bır jetıstıgımız 51 kelı salmaqta qola jüldege qol sozǧan Jaina Şekerbekova biyl jazda Rio-de-Janeiroda ötetın jazǧy Olimpiada oiyndaryna joldama aldy.
Sonymen Astana törınde ūiymdastyrylǧan äielder arasyndaǧy älem chempionaty tarih qoinauyna öttı. Eŋ bastysy, būl jarys qazaq qyzdary törtkül dünienı qairan qaldyryp, el sportynyŋ tarihyna jaŋa jarqyn körsetkışter qosty.
Ǧalym QOJABEKOV
