Marina Volnova. Būl esım jūmyr jerge jaiyldy. Sonau Syr öŋırınde düniege kelıp, Tūmandy Albiondaǧy olimpiadada tūŋǧyş ret ötkızılgen qyzdar arasyndaǧy boksta örşıl ruh tanytyp, qanjyǧasyna qola medaldı bailady.
6 tamyz, 2012 jyl. Bokstan qyzdar arasyndaǧy şirek final ötkızılıp, 75 kelı salmaqtaǧy Marina Volnova älem chempiony ūlybritaniialyq Savanna Marşaldy 16:12 esebımen ūtyp, aidy aspanǧa bır-aq şyǧardy. Nebärı 23 jastaǧy sportşynyŋ būl ırı jetıstıgıne qazaqstandyqtar süisıne qol soqty. Er tanytar erlıktıŋ ülgısın paş etken jerlesımızdıŋ osy jeŋısın qalai maqtasaq ta, jarasymdy. Mamandardyŋ pıkırınşe, Klarissa Şildsten basym tüse almauy bar küşın aldyŋǧy aiqastarda sarqa paidalanǧan. Degenmen, nätije jaman bolǧan joq.
Jalpy, Qyzylorda oblysynda sportty damytu mäselesıne basa köŋıl bölıngen. 5 synypta sport mektebınıŋ tabaldyryǧyn attaǧan Marinanyŋ alǧaşqy jattyqtyruşysy Baqytbek Qūlbaev boks älıppesın jetık üiretken edı. Jattyǧu erejesın būzbaǧan şäkırtınen jattyqtyruşysy da ülken ümıt kütken. Sol senım aqtaldy. Maŋdai terdıŋ öteuı qaityp, Olimpiada törıne şyqty.
«Qolda ösken tūlpardyŋ tai aty qalmaidy» degen naqyl bar. Qyz bala bolsa da, azamattyŋ ısıne tatyrlyq jeŋıstı elıne syilaǧan sportşyny halqy jaqynda äuejaidan kütıp aldy. Jer-jerde ötkızılgen kezdesulerden uaqyt tauyp, bızge de sūhbat berdı. Jeŋısımen qūttyqtadyq. Qūryş bılektı Marina aǧynan jaryldy. Tuǧan jerın saǧynypty. Balalyq şaqqa saiahat jasap, sporttaǧy jetıstıgın tızbektep şyqty.
– Menıŋ balalyq şaǧym qalyŋ qazaqtyŋ ortasynda öttı. Qazaq tılınde erkın söileuıme solardyŋ yqpaly mol boldy. Qazaqtyŋ salt-dästürın de jetık bılemın. Aǧaiynǧa bauyrmaldyǧy, qonaqjailyǧy özgelerge ülgı bolarlyq. Bızdıŋ Syr öŋırınde sportqa erekşe maŋyz berılgenın de atap ötkım keledı. Alǧaşynda dziudomen şūǧyldandym. Boksty bastauymnyŋ özı de qyzyq boldy. Basynda özımdı qorǧau üşın barǧanmyn. Jattyqtyruşy menıŋ beiımımdı aŋǧaryp, üzdıksız ainalysuyma keŋes berdı. Sodan, 2006 jyldan bastap boksty janyma serık ettım. Talmai eŋbektegennıŋ nätijesı bolar, 2010 jyly bokstan älem chempionatynyŋ kümıs jüldegerı atandym. Al, Londonda ötetın olimpiadaǧa ekı jyl boiy daiyndaldym. Bırınşı kezdesude keniialyq boksşymen şaiqastym. Ol da oŋai şaǧylatyn jaŋǧaq emes. Ekınşısınde, Savanna Marşalmen jekpe-jekke şyqtym. Qorytyndysy qandai bolǧanyn özderıŋız jaqsy bılesızder. Üşınşı aqtyq kezdesude amerikalyq boksşyny ala almadym. Menıŋ oiymşa, aldyŋǧy ekeuıne bar küşımdı jıberdım.
Bıraq, būl menı eş jasyta almaidy,–deidı Marina jıgerlı ünmen.
Desek te, jarys bolǧasyn bıreuı ūtylys tauyp, ekınşısı jeŋıs tūǧyryna köterıledı. Sportşynyŋ küş-quatyn tūlǧasyna qarap baǧalau äste äbestık eken. Eger, onyŋ boiynda jıger bolmasa, jeŋıstı sättı kütu mülde aqylǧa syiymsyz. Sol üşın adam ruhani jaǧynan kemel boluy qajet. Osyndai pıkırdı ortaǧa salǧan Marinanyŋ tūla boiynan erlerge tän qaisarlyqtyŋ nyşanyn aŋǧardym.
Onyŋ elordaǧa kelgenıne üş jyldyŋ jüzı auyp barady. Mūnda jattyǧu jūmysyn tiianaqty oryndauyna barlyq mümkındık jasalǧan. Aptasyna üş ret on şaqyrym jerge jügıredı. Odan qaldy, denenı şynyqtyrumen ainalysady. Eldegı ata-anasyna qol ūşyn beredı. Öitkenı, olar däl qazırgı kezde jūmyssyz. Al, özı bır bölmelı qyzmettık päterde tūryp jatyr.
Nede bolsa, qazaqtyŋ atyn şyǧarǧan Marinanyŋ joly bölek. Endıgı ötkızıletın olimpiadaǧa da baruǧa niettı. İä, arman qala asqaq Astanaǧa kelıp, tynysyn aşqan sport- şy qyzdyŋ alar asuy älı alda. Özı aitpaqşy, jürektılerdı ǧana sport törge şyǧarady.
*Uyz lebız
Panabek YRYSOV:
Men ony bala kezınen bılemın. Sebebı, bır köşede qatar östık. İyǧyna sporttyq sömkesın asyp alyp, sport mektebınen şyqpaityn. Aqyry, sol eŋbegınıŋ öteuı qaitty. Jas ta bolsa qabıletı mol. Älem chempionynyŋ mysyn basu ekınıŋ bırınıŋ qolynan kele bermeidı. Alǧa, jerles, osy baǧytynan taimaǧaisyŋ!
Qairat JALǦASBAEV:
Keşegı Londonda ötken jarysta Qazaqstan elı on üş medal enşılep, 12-orynǧa köterıldı. Būl – täuelsızdıktıŋ jemısı, būl – būryn-soŋdy bolmaǧan jetıstık. Mereiımızdı tasytqan Marina qaryndasymdy da böle-jara aitqym keledı. Jalpy, onyŋ Astanaǧa qonys audaruy jaŋa tabystardyŋ qosa keluıne yqpal jasady dep oilaimyn.
Ämırhan ALMAǦANBETOV
