Nūr-Sūltan qalasynyŋ äkımı A.Kölgınov bozala taŋnan şahardy aralap ülestık qūrylys nysandaryna at basyn tırep, Abai köşesınde salynyp jatqan ekı mūnaradan tūratyn «Stolichnyi-2» tūrǧyn üi keşenınde boldy. Mūnda üleskerler qatary 206 adamdy qūraidy.
«Bız uaqytty bos jıberıp almauymyz kerek. Kürdelı mäseleler qalyptasqan, bız olardy ret-retımen şeşetın bolamyz. Kün saiyn josparǧa sai jūmys jasaluy kerek. Eŋ bastysy, jūmys toqtap qalmauy tiıs» dedı A.Kölgınov. Äkım tehnikany aumaqta jūmyldyru jäne qūrylys jūmystaryna kırısu qajettıgın atap öttı. Ekınşı nysan Ş.Qosşyǧūlūly 6/2 köşesınde ornalasqan «Aqerke-2» TK. Üleskerlerdıŋ jalpy sany – 173 adam. Jūmystardyŋ qaldyq kölemıne smetalyq qūjattama boiynşa «Memsaraptama» RMK qorytyndysy alyndy. Mäselen, qūrylys saluşyǧa smetalyq qūjattamamen jäne syrtqy injenerlık jelılermen bırge 2-şı kezektegı jūmys jobasyn äzırleuge kırısu qajet.
Üleskerlerdıŋ aituynşa, köpşılıgı öz jerlerın satyp, nesie alyp, qūrylysy 2015 jyly aiaqtaluy tiıs «Aqerke-2» tūrǧyn üi keşenıne qarjy salǧan. «Jūmysty öz kezeŋımen jürgızu qajet. Ekınşı nysannan bos oryndardy satu boiynşa qūrylys saluşynyŋ ūsynysy qarastyrylatyn bolady. Bırınşı jäne ekınşı obektılerde jūmysty qaita bastau qajet. Qūrylys mausymy jaqyn arada aiaqtalady, nätijesın körsetesızder» dedı qala basşysy. Jalpy elordada qūrylysy aiaqtalmaǧan 51 nysan bar.
