Keşe elorda ırgesındegı Qaraötkel kentındegı 5573-äskeri bölımınde QR Ūlttyq ūlan Bas qolbasşysynyŋ jüldesı üşın «Äskeri kernei» festivalınıŋ merekelık saptyq konsertı saltanatty türde aşyldy. Astana äkımdıgınıŋ qoldauymen ötken igılıktı şara – Qazaq handyǧynyŋ 550 jyldyǧy men Ūly Jeŋıstıŋ 70 jäne Ata zaŋymyzdyŋ 20 jyldyǧyna arnaldy.
Osymen törtınşı märte ötıp otyrǧan mereilı baiqauǧa elımızdegı Ūlttyq ūlan öŋırlık qolbasşylyqtary, Memlekettık küzet qyzmetı men ŪQK Şekara qyzmetınıŋ jäne Resei Federasiiasy IIM Işkı äskerlerınıŋ «Soltüstık-Batys» öŋırlık qolbasşylyǧy ştabynyŋ (Sankt-Peterburg) orkestrlerı qatysty. Festival aiasynda on äskeri ūjym köpşılık aldynda öz önerlerı men käsıbi şeberlıkterın synǧa salyp, är şyǧarmany üilesımdı oryndau mänerımen saiysqa tüstı. Taŋerteŋ Qaraötkelden bastalǧan mädeni şara keşke deiın jalǧasyp, qaladaǧy Esıl özenınıŋ jaǧasyndaǧy Oquşylar men «Jastar» sarailary jäne «Qazaqstan» sport keşenınıŋ aldyndaǧy alaŋdarda konserttık baǧdarlamalaryn jūrtşylyq nazaryna ūsyndy.
Baiqauǧa qatysqan äskeri ūjymdar barlyǧy bügın keşkı 18.00-de elorda äkımşılıgınıŋ aldynda merekelık saptyq konsert ötkızbek.
Azamat ESENJOL
