Qala köşelerınıŋ bırınde ketıp bara jatyp, jol boiyndaǧy qaptaǧan kölıktıŋ ışınen sap-sary tüsımen daralanyp, özgelerge qaraǧanda asyqpai qozǧalyp kele jatqan şaǧyn avtobusqa közımız tüstı. Bırden amerikalyq kinolarda jiı körsetıletın balalar avtobusy eske tüspesı bar ma? Oiymyzdyŋ arnasy dūrys ekenın qabyrǧasyndaǧy «Schoolbus» degen jazudy oqyǧanda tüsındık. Sol sätte sanamyzda san sūraq tuyndap ülgergen edı. Män-jaidy anyqtau üşın jauaptaryn ızdestıre bastadyq…
Eŋ aldymen, avtobus atauyn Google dosymyzdan sūrap, tabylǧan mekenjaiǧa jol tarttyq. «Highvill» tūrǧyn üi keşenınde ornalasqan kışıgırım ǧana keŋse ışınen bızdı özın Albert Ni dep tanystyrǧan «Schoolbus» direktory jyly qarsy alyp, ıstıŋ neden bastau alǧanyn baiandai bastady.
2013 jyly jūmys babymen janūiasyn ertıp, Atyraudan Astanaǧa köşıp kelgen ol kışkentai qyzyn balabaqşaǧa ornalastyrady. Ünemı jinalystarǧa qatysyp, ıssaparlarǧa ketuge tura keletındıkten, olardyŋ aldynan balany balabaqşaǧa jetkızu mäselesı şyǧa keledı. Jūbaiymen bırge tasymaldaudy jüzege asyratyn bırde-bır kompaniiany tappai qinalady. Al taksi şaqyryp, ūzaq kütemız dep, baratyn jerlerıne talai ret keşıgıptı. Sol kezde Albertke balalardy tasymaldaumen ainalysatyn kompaniia qūru turaly oi keledı. Özı kelgen jūmys filialy qaitadan Atyrauǧa auysqanda, olar elordada qaludy jön sanap, «täuekel» dep, alǧaşqyda oiǧa kelgen osy qiialdy ömırde oryndauǧa kırısedı. «Eŋ äuelı, äke retınde balamdy kımge senıp tapsyratynymdy oiladym. Mysaly, jolşybai taksi toqtatsam da, aldyn ala şaqyrtsam da, olar uaqyttyŋ tyǧyzdyǧyna bailanysty jolda ūşyp jürıp, ylǧi da rasiiamen ne ūialy telefonmen söilesetındıkten, qyzmetterıne kümänmen qaraimyn. Tıptı, olardyŋ naqty keletındıgıne de senımdı bola almaimyz» deidı Albert Ni. Balalar kölıgınıŋ standarttyq talaptaryn jete zerttep, zaŋgerlermen keŋese kele, ol mäskeulıktermen bailanys ornatady. Olar atynan-aq zaty tüsınıktı bolatyn kompaniiany «Schoolbus» dep ataidy. Logotiptı de sol mäskeulıkter ūsynady.
Sonymen, Robert Siraev atty jürgızuşınıŋ tapsyrys uaqyty jaqyndap, qyzmet sapasyn közben köru üşın sary kölıkke bız de otyrdyq. Būl bes balaǧa arnalǧan miniven eken. Oryndyqtary yŋǧaily, kışkentai balalarǧa arnalǧan arnaiy kreslolar da bar. Aitylǧandai-aq, avtobus saǧatyna 60 km jyldamdyqpen jürıp keledı. Aldyndaǧy kamera arqyly syrttaǧy jol men salon ışı taspaǧa jazyluda. Milan kvartalyndaǧy «Bebi klubtan» kölıkke 4 jasar kışkentai qyz ben bır äiel kısı yŋǧaily jaiǧasyp alǧany sol edı, büldırşın qyŋqyldap ta ülgergen joq, salonǧa ornatylǧan ekrannan «Maşa i medved» multfilmı körsetılıp, kışkentaidyŋ bar nazary soǧan audy. Al, qasyndaǧysy bala kütuşısı bolyp şyqty. «Öte yŋǧaily avtobus. Bastysy, keşıgu degen joq. Uaqytymen, keide tıptı erte keledı. «Meruert, avtobus keldı» desem bolǧany, mäz bolyp, esıkke qarai jügıredı. Jol boiy teledidardan multfilmder köredı» deidı kütuşısı Qalamqas Jekebaeva. Olar üidıŋ janynan tüstı. Al, jürgızuşı bolsa, bızge taǧy bır aqparat aita kettı. Ata-ana balanyŋ aldynan şyǧa almaǧan künde, jürgızuşı ony esıgıne deiın şyǧaryp salady eken.
Bügıngı künı är ata-ana özderıne berılgen login arqyly saitqa kırıp, avtobustyŋ qai jerde ketıp bara jatqanyn GPS arqyly köre alady. Al, kompaniia direktorynyŋ aituynşa, bala kölıkke mınıp-tüsken kezde ata-ananyŋ telefondaryna avtomatty türde habarlama kelıp tūratyndai baǧdarlama jasaluda.
Mädina JAQYP
