«Astana aqşamy» gazetınde jariialanǧan «Menıŋ atam – maidanger» konkursy jaiynda elordamyzda tūratyn tuysqandarymnan estıp, men de soǧysta erlık körsetken atam turaly jazudy jön kördım. Menıŋ atam – Saqtapbergen Aqmaǧambetov 1942 jyly Ūly Otan soǧysyna attanǧan.
Soǧysqa kırıskenşe arnauly äskeri oqu bölımşesınde tankist äskeri mamandyǧyn igerıp alady. Sodan Ukraina, Polşa, Chehoslovakiia jerlerın faşisterden azat etuge qatysyp, Berlinge şabuyl jasauşylardyŋ qatarynda bolǧan. Onyŋ keudesın köptegen orden-medaldar kömkerıp tūratyn. Soǧystaǧy bır operasiia barysynda erlık körsetkenı üşın komandirler atamdy «Qyzyl Jūldyz» ordenımen marapattaǧan.
Äkemnıŋ aituynşa, ol uaqiǧa bylai bolǧan eken: 1944 jyly Berlinge qarai bet alyp bara jatqanda bızdıŋ jaiau äsker faşister bekınıp alǧan bır derevniadan ärı öte almai tūrady. Sonda menıŋ atam bastaǧan «T-34» tankı derevniaǧa basa kırıp, jaudyŋ bärın jer jastandyrǧan eken. Mıne, sol jolǧy erlıgı üşın menıŋ atam ordenge ūsynylypty.
Soǧystan keiın atam taǧy da bes jyl äskeri qyzmette bolǧan. 1950 jyly kapitan şenınde elge oralǧan. Beibıt ömırde atam Qostanai öŋırındegı şaruaşylyqta ūzaq jyldar avtomobil jürgızuşısı, mehanizator bolyp eŋbek ettı. Sovhozdyŋ garajyn basqarǧan. Tüiındep aitqanda, menıŋ atam eŋbek maidanynda da qajyrly qairatymen, eren eŋbegımen el-jūrtqa syily bolǧan.
Soǧysta jäne eŋbekte köpşılıkke önege bolǧan maidanger atam ülken äulettıŋ basy boldy. Segız balasynan 28 nemere, 32 şöberesı bar. Men şöberesımın. Ökınışke qarai, atam ömırden erterek ötıp kettı. Sondyqtan, men maidanger qariia körgende Saqtapbergen atamdy eske alamyn. Al, biylǧy Ūly Jeŋıstıŋ 70 jyldyq mereilı toiymen bızdıŋ barşamyzǧa beibıt ömır syilaǧan barlyq soǧys ardagerlerın qūttyqtaimyn.
Aqbota ERMEKBAI,
«Daryn» orta mektebınıŋ oquşysy
Qostanai qalasy
