El ömırındegı eŋ eleulı saiasi nauqan abyroimen aiaqtaldy. Qazaqstandyqtar qapysyz qalauyn bıldırdı. Aqordanyŋ iesı anyqtaldy. Örkeniet örıne ūmtylǧan halqymyz öz taǧdyryn taǧy da Nūrsūltan Nazarbaevtai ūltyn ūlyqtaǧan ör tūlǧaǧa senıp tapsyrdy.
Prezident sailauyna ärtürlı sebeptermen älemnıŋ är şalǧaiynda jürgen otandastarymyz da belsene qatysqany belgılı. Mäselen, Mäskeudegı Qazaqstan Respublikasy Elşılıgı janynan qūrylǧan
№215 sailau uchaskesıne keluşıler legı aq taŋnan – qara keşke deiın tolastamaǧanyn közımızben kördık. Azamattyq paryzyn öteuge asyqqan aǧaiynnyŋ alabūrtqan jüzderınen köterıŋkı köŋıl-küidıŋ lebı aŋǧarylady. Bır-bırımen quana qauyşqan qandastarymyz özara qazaqşa qauqyldasyp, ädemı äserge bölendı. Osy jaqta tūryp jatqanyna on jylǧa juyqtaǧan qaraköz qaryndasymyz Kämşat Bolysbaeva arman quyp, alysqa ketkenımen arttaǧy Atajūrtyn bır sätke de esten şyǧarmaitynyn ekpın tüsıre aitty.
– Qazırgı taŋda älemdık qauymdastyqtan oiyp otyryp oryn alǧan täuelsız Qazaqstan men onyŋ köregen köşbasşysy Nūrsūltan Äbışūly Nazarbaev turaly reseilıkterdıŋ auzynan jyly sözdı jiı estimın. Sondai sätterde keudemdı maqtanyş kerneidı. Keşegı Keŋestık respublikalar arasynda oq boiy ozyq tūrǧan mereilı memleketımızdıŋ abyroi-bedelı asqaqtai bergei!
Al, Kostroma qalasyndaǧy äskeri akademiianyŋ kursanty Raqyş Jūmabaev keleşekte Qaruly Küşterımızdıŋ qataryn tolyqtyrmaq. Elımızdıŋ erteŋın aiqyndauda airyqşa oryn alatyn taǧdyrşeştı taŋdau jasauǧa mümkındık tuǧanyna rizaşylyq tanytqan jas sarbaz būl sailaudyŋ sanaǧa salmaq salar zor jauapkerşılıgın jete sezınetının jetkızdı.
Resei Federasiiasynyŋ Ükımetı janyndaǧy Qarjy universitetınıŋ studentı Äsel Taubaevanyŋ oiynşa, osy sailauda bız Elbasyn taŋdap qana qoimai, bükıl elımızdıŋ aldaǧy uaqytta qalai damitynyn aiqyndauǧa üles qosamyz. Sondyqtan, ärbır qazaqstandyqtyŋ osyǧan orai ornyqty közqarasyn bıldırgenı jön.
Atalmyş sailau komissiiasynyŋ töraǧasy Viktor Temırbaevtyŋ aituynşa, Mäskeuden basqa, Reseidıŋ Sankt-Peterburg, Qazan, Omby, Astrahan sekıldı qalalaryndaǧy bızdıŋ diplomatiialyq missiialarynda qazaqstandyq azamattardyŋ dauys beruıne jaǧdai jasalǧan. Olardyŋ ūzyn-sany üş myŋ adamnyŋ üstınde körınedı. Būlarǧa ıssaparda jürgen, qydyryp kelgen jerlesterımızdı qossaq, sailauşylar sany bırşamaǧa jeterı anyq.
Toqsan auyz sözdıŋ tobyqtai tüiının aitsaq, būl künı Mäskeudegı uchaskege sailauşylardyŋ 95 paiyzdan astamy kelıp, olardyŋ 99,73 paiyzy Nūrsūltan Nazarbaevtyŋ kandidaturasyn qoldap dauys bergen.
Talǧat BATYRHAN
