«Bır jaǧynan, monopoliiaǧa qarsy vedomstvonyŋ ünsız kelısuımen öz qyzmetkerlerıne syiaqylar men bonustar qosylyp, nesie boiynşa aqy tölenıptı. Ekınşı jaǧynan, şyǧyndardy köbeitu maqsatynda qymbat baǧamen jöndeu jürgızu jäne jabdyqtar satyp alu üşın qyzmet körsetetın arnaiy käsıporyndar qūrylǧan. Qūityrqy jolmen tapqan tabys «qolma-qol aqşaǧa ainaldyratyn» kompaniialardyŋ kömegımen şyǧarylyp otyrǧan» dep mälımdedı Bas prokuraturadaǧy basqosuda vedomstvo basşysy.
Bas prokuror tūrǧyndardy tonaǧan monopolisterdıŋ zaŋsyz äreketıne qūzyrly qos ministrlıktıŋ (Ūlttyq ekonomika jäne Energetika ministrlıgı) tiıstı baqylau jasamaǧanyn aşyq aitty. Bölek bekıtılgen tarifter, özara jäne salyq organdarymen kelısımnıŋ joqtyǧy qaraşany tonauǧa mümkındık bergen. «Eger üş jylda uäkılettı organdar tūtynuşylarǧa 3,7 mlrd teŋgege şyǧynnyŋ ornyn toltyrsa, al prokurorlar bır ǧana tekserısten keiın 8 esege artyq zaŋ būzuşylyqtardy anyqtady. Tekserıs nätijesınde
15 lauazymdy tūlǧa jazaǧa tartylyp, monopolisterden 159 mln teŋge aiyppūl öndırıldı. 10 qylmystyq ıs qozǧaldy» degen derek keltırdı Qairat Qojamjarov.
Bas prokurordyŋ orynbasary Andrei Lukin «Astanaenergotūtynu» JŞS elektr quatyn 11,8 teŋgege satyp alatynyn qaǧazda ǧana körsetkenın äşkereledı. Aranyn apandai aşqan kompaniia jyludy būdan arzanǧa alyp, astanalyqtarǧa qymbatqa satyp kelıptı. Söitıp elordalyqtardan 2,6 mlrd (!) teŋge artyq aqşa jinapty. «Qaraǧandyjaryq», «Jambyl elektr jelısı», «Taldyqorǧanjylu», «Kökşetau», «Qapşaǧaijylu» kompaniialary däl osyndai ädıspen aŋqau eldı aldaǧan körınedı.
«Qaitqan malda qaiyr bar». Jylu men jaryqtyŋ baǧasyn ädeiı ösırgen monopolister prokurorlardyŋ tekseruınen keiın 5 mln tūtynuşyǧa 13 mlrd teŋgesın qaitaryp beruge mäjbür bolǧan. Bas prokuror Qairat Qojamjarov qalǧan qarajattyŋ halyqqa köp ūzamai qaitarylatynyn mälımdedı. Bır quanarlyǧy, qūzyrly mekemenıŋ basşysy elımızdegı 14 öŋırde elektr quaty men jyludyŋ qūny arzandaǧanyn aitty.
