Bügın Qazaqstan Premer-Ministrı Kärım Mäsımov QR Parlamentı palatalarynyŋ bırlesken otyrysyna qatysty, onyŋ barysynda 2015 jylǧy respublikalyq biudjettıŋ atqaryluy turaly esep qaralyp, bekıtıldı.
Deputattardyŋ aldynda söz söilegen K.Mäsımov QR Prezidentı N.Ä.Nazarbaevtyŋ tapsyrmasy boiynşa Ükımet ärekettegı baǧdarlamalar aiasynda qarajatty qaita bölu boiynşa jūmys jürgızıp jatqanyn aityp öttı.
«Bız «Nūrly jol» baǧdarlamasynyŋ keibır baptaryn, aǧymdaǧy ekonomikalyq jaǧdaidy eskere otyryp, Ükımettıŋ ışındegı keibır qosymşa resurstardy qaita qaraimyz. Qysqa merzımdı josparda qarajatty äldeqaida tiımdırek paidalanudy közdep otyrmyz», – dedı K.Mäsımov.
Premer-Ministrdıŋ pıkırınşe, ekonomika ösımıne tūrǧyn üi qūrylysy kölemın odan ärı ūlǧaitu jaqsy serpın bolmaq. Osy maqsattaǧy «Nūrly jol» baǧdarlamasynyŋ jaŋa baǧyty JTQ infraqūrylymyn jürgızu bolmaq.
«İnfraqūrylymmen qamtamasyz etılgennen keiın 10 sotyq jer bölu mäselesı būl jaǧdaidy şeşu üşın oŋ tüzetuler engızedı dep sanaimyz. Sondyqtan resurstardyŋ bır bölıgı jeke tūrǧyn üi qūrylysy infraqūrylymyn damytuǧa baǧyttalatyn bolady», – dep basa aitty K.Mäsımov.
Sondai-aq el Prezidentınıŋ tapsyrmasymen Ükımet memlekettıŋ ekonomikalyq saiasatyna özgerıster engızu boiynşa mäselelerın talqylauda, olar aǧymdaǧy jyldyŋ qyrküiegınde Parlamenttıŋ qarauyna engızıledı, dedı Premer-Ministr.
Öz sözınıŋ soŋynda Kärım Mäsımov Parlament deputattaryna aşyq jäne konstruktivtı dialog üşın alǧys aitty.
primeminister.kz
