Astana qalasy äkımınıŋ orynbasary Aida Balaevanyŋ töraǧalyǧymen äkımdık janyndaǧy jastar ısterı jönındegı keŋestıŋ kezektı otyrysy öttı. Oǧan memlekettık mekemelerdıŋ basşylary, jastar ūiymdarynyŋ ökılderı qatysty. Is-şarada jaŋadan aşylǧan «Astana jastary» resurstyq ortalyǧynyŋ qyzmetı tanystyryldy.
Ortalyq direktory Qaiyrbolat Sahmetovtyŋ aituynşa, mekeme bırneşe baǧytta jūmys ısteidı. Atap aitqanda, jūmysqa ornalastyru, tūrǧyn üi turaly keŋes beru, zaŋdyq tūrǧyda kömektesu. Sonymen qatar, erıktıler qozǧalysyn damytyp, olardy «EXPO-2017» halyqaralyq körmesın ūiymdastyru jūmysyna tartumen ainalysady. Jastarǧa türlı treningter men seminarlar ötkızılıp, bılıktı de, bılımdı erıktıler daiyndap şyǧarady. Adamdarmen qarym-qatynas jasauǧa, tıldı, eldıŋ tarihyn jetık meŋgeruge üiretedı. Ortalyq bır jylda 1100 erıktı daiyndap şyǧudy josparlap otyr.
Astana qalasy äkımınıŋ orynbasary Aida Balaeva mūndai ortalyqtardyŋ jastardyŋ jaŋa mümkindikterıne jol aşyp, biik belesterge jeteleitinin aitty. Halyqaralyq EKSPO körmesı qarsaŋynda bolaşaǧyn bas qalamen bailanystyrǧysy keletınder köbeiıp keledı. Qalaǧa bırneşe tıldı jetık meŋgergen, medisina, qūrylys, energetika, mädeniet pen kölık salasyndaǧy mamandar qajet. Osy oraida, Astana qalasy Jastar saiasaty mäselelerı basqarmasynyŋ basşysy Talǧat Rahmanberdı: «Basqa oblystardan keletın jastardyŋ sany öte köp. Ortaşa eseppen barlyq aimaqtan qalaǧa künıne 300-ge juyq avtobus, 60-qa juyq poiyz keledı. Bır künde 30 myŋdai adam kelse, onyŋ jartysynan köbısı jastar. Byltyr 21 000 tülek oquǧa tüsuge keldı» dedı.
SÜBELI SÖZ
Aida BALAEVA, Astana qalasy äkımınıŋ orynbasary:
– Astanaǧa köşıp keletın jastar az emes. Olardy bırınşıden – jūmyssyzdyq, ekınşıden – baspana mäselesı qinaidy. Mūndai jaǧdaida tyǧyryqqa tırelmes üşın osyndai ortalyqtyŋ bolǧany jaqsy. Olarǧa elordaǧa qandai mamandar jetıspeidı, tūrǧyn üi mäselesınde qandai mümkındıkter bar ekenın jan-jaqty tüsındıruımız kerek. Aitalyq, «Qoljetımdı baspana» baǧdarlamasy bırneşe baǧytta jüzege asyrylyp jatyr. Barlyq bastamalar osy ortalyqta jüzege asady degen oidamyn.
Sondai-aq, basqarma basşysy jastardy jūmysqa ornalystyru boiynşa, jaŋa pilottyq joba ıske qosylatynyn aitty. Mobildı ortalyq avtovokzal men temır jol vokzalynda ornalasady. Keluşılerge bukletter taratylyp, konsultasiia berıledı.
Erkejan SÄTIMBEK
