Qalalyq Jūmyspen qamtu ortalyǧynyŋ ūiymdastyruymen «Astana Mall» sauda-oiyn-sauyq ortalyǧynda bos jūmys oryndar järmeŋkesı öttı.
Järmeŋke türlı salanyŋ kadr qyzmetkerlerı men käsıporyn basşylarynyŋ basyn qosty. Qūrylys firmalary, ekınşı deŋgeilı bankter, meiramhana, qonaqüi biznesı, sauda jelılerı sekıldı qyzmet körsetu salasynyŋ mamandary, sondai-aq ışkı ıster organdary, bılım beru mekemelerı men densaulyq saqtau ūiymdarynan kelgen 40-tan asa jūmys beruşı 260-qa juyq bos oryn ūsyndy. «Būl – ūsynys pen sūranysty qanaǧattandyratyn tiımdı alaŋ. Bar-joǧy üş saǧat ışınde bır ǧana jūmys beruşı jüzden köp tüiındeme qabyldap, sol mezette keluşını äŋgımelesuden ötkızedı. Jūmyssyzdar da künı boiy bırneşe jerdı aralap, aiaq tozdyryp jürmeidı. Eŋbekke talpynǧandar üşın mümkındık köp. Jyl basynan berı mūndai bos jūmys oryndar järmeŋkesınıŋ törteuı öttı. Biyl taǧy 8-ın ūiymdastyru josparlanǧan» deidı Jūmyspen qamtu ortalyǧynyŋ direktory Oljas Omar. Onyŋ aituynşa, köp jaǧdaida bos oryndar iesın tappai jatady. Bügıngı künnıŋ özınde Jūmyspen qamtu ortalyǧynyŋ mälımetter bazasynda 3000-nan asa vakansiia tırkelgen. Al jūmysty belsene ızdeuşıler sany myŋǧa juyq. Būnyŋ türlı sebebı bar. Köbıne jūmyssyzdar jalaqy somasyn mıse tūtpaidy, mekemenıŋ mekenjaiy üiden alys dep jatady. Osy tūrǧyda järmeŋkege keluşılerdıŋ bırsypyrasymen tıldesıp kördık. «7 jyl memlekettık qyzmette jürdım. Jūmyssyz qalǧanyma 7 aidyŋ jüzı boldy. Daǧdarystyŋ saldary şyǧar. İnternetten tapqan oryndarǧa habarlasqanda «kısı alyp qoidyq», «firma jabylyp qaldy» degen jauaptardy jiı estıdım. Keşe ǧana Astana äkımdıgınıŋ saitynan qaladaǧy ıs-şaralar kestesın qarap otyryp, järmeŋke jaily bıldım. Mūnda arhitektor jūmysyn qarastyryp jürmın. Mamandyǧyma sai tek dizainer ornyn taptym. Jūmys – kündelıktı qajettılıkterdıŋ öteuı ǧoi. Sondyqtan talǧap jüretın uaqyt joq. Dizainerlıkke qabyldamasa, kez kelgen eŋbek türıne äzırmın» deidı Qairat Jūmabaev. Tärbieşı, satuşy, elektrik, qūrylysşy siiaqty vakansiia ūsynǧan üstelderde kısı qarasy köp jinalǧan. Al, №1 qalalyq balalar auruhanasynan kelgen kadr qyzmetkerınıŋ aldynda bırdı-ekılı reziume ǧana jatyr eken. «Pediatr, anesteziolog, gematolog, kardiolog, allergolog därıgerler qajet. Bıraq, järmeŋke bastalǧaly medisinalyq bılımı, eŋbek ötılı bar mamandar jolyqpady. Ekı-üş meiırbike ǧana keldı» deidı atalmyş mekemenıŋ kadr qyzmetkerı. Al, №73 «Aiaulym» balabaqşasy meŋgeruşısınıŋ şarua ısı jönındegı orynbasary «Muzykalyq jetekşı, tärbieşı, tärbieşınıŋ kömekşısı, medbike syndy 7 bos jūmys ornyna jarty saǧat ışınde 21 adam ümıt bıldırdı. Äŋgımelesu barysynda olarǧa jūmys kestesın, ornalasqan jerın tüsındırıp, mekeme talaptarymen tanystyrdym. 15 adam osy jerden şyǧyp, bırden balabaqşanyŋ qabyldau bölımıne tartypty» deidı.
Järmeŋke barysynda jūmys ızdep kelgen 1386 adam tırkeldı. Şara qorytyndysy boiynşa 75 adam jūmysqa ornalastyryldy.
Aita keteiık, jyl basynan berı Astana qalasy äkımdıgınıŋ Jūmyspen qamtu ortalyǧyna jügıngen 4810 astanalyqtyŋ teŋ jartysy eŋbekpen qamtyldy. 63-ı äleumettık jūmys oryndaryna, 220 tülek «Jastar täjıribesıne» jıberıldı, 919 adam qoǧamdyq jūmystarǧa qatyssa, 307 azamat qaita oqytu kurstarynan ötıp jür.
Mädina JAQYP
