Keşe Astanadaǧy «Saryarqa» velotregınde «Nūr Otan» halyqtyq-demokratiialyq partiiasy «Jas Otan» jastar qanatynyŋ ekınşı sezı öttı. Oǧan Elbasy Nūrsūltan Nazarbaev qatysyp, söz söiledı.
«Arman! Eŋbek! Senım!» degen ūranmen ötken aituly forum – tek «Jas Otan» müşelerı üşın ǧana emes, küllı qazaqstandyq jastar üşın maŋyzdy oqiǧa. Öitkenı, sezd elımızdıŋ jastar saiasatyn damytuǧa jaŋa serpın beretınıne örender kämıl senıp otyr.
Alqaly jiyndy aşqan Elbasy, «Nūr Otan» HDP-nyŋ töraǧasy Nūrsūltan Nazarbaev jastardyŋ el saiasatyn örkendetuge qosyp jatqan ülesı jönınde aita kele, olarǧa memleket airyqşa qamqorlyq körsetıp, qandai ıste de qoldau bıldırıp otyrǧanyn atap öttı. Elımızde qolǧa alynǧan «Bolaşaq», «Jasyl el», «Diplommen – auylǧa», «Jastardyŋ kadrlyq rezervı» syndy baǧdarlamalar – sonyŋ kuäsı.
– Soŋǧy jetı jyl ışınde jastar saiasatyndaǧy jobalardy qarjylandyru 10 esege östı. Tek biyldyŋ özınde jas mamandardyŋ baspanaly boluyna jäne olardy qoldauǧa 12 milliard teŋge jūmsaldy. 2020 jylǧa deiın jas otbasylarǧa arnap, 1 mln 200 myŋ şarşy metr tūrǧyn üi saludy tapsyrdym. Būl – qūrǧaq sifrlar emes. Är körsetkıştıŋ artynda orasan eŋbek, senderge degen memlekettıŋ qoldauy, senımı jatyr, – dedı Prezident.
Täuelsızdıktıŋ alǧaşqy jyldarynda eldıŋ basyna tüsken kürdelı kezeŋdı bır şolyp ötken Elbasy senım men qajyrly eŋbektıŋ arqasynda memleketımız bügıngıdei ırgelı elge ainalǧanyn atap öttı.
– Tynymsyz eŋbektıŋ arqasynda bız kım boldyq? Adam basyna şaqqandaǧy jalpy ışkı önımımız 16 ese ösıp, är adamǧa şaqqanda 12 myŋ dollarǧa jettı, – dedı ol. – Qai kezde qazaq mūny armandap edı?! Allanyŋ bergen bailyǧy bar. Ol bızge qajet. Bıraq, bır künı ol da tausylady. Bar küş-jıgerımızdı industrialdyq damuǧa salyp jatqanymyz da sondyqtan. Qazırgı künı industrialdyq kartasynyŋ aiasynda 10 trillion teŋge tūratyn 600-den astam joba jüzege asyrylyp jatyr. Būl – jastar üşın 370 myŋ jaŋa jūmys orny aşylady degen söz.
Prezident jastardy qoldauǧa arnalǧan taǧy köptegen igı ıster qolǧa alynu qajettıgın basa aitty. Mysaly, elımızde 11 jastar ūiymy jūmys ısteidı. Olarmen Ükımet, ärbır ministrlık, ärbır vedomstvo tyǧyz qarym-qatynasta jūmys ısteuı qajet. Sonymen bırge «Jas Otan» ökılı ükımettık emes ūiymdarmen jūmys keŋesınıŋ qūramynda boluy kerektıgın tılge tiek etken Elbasy Ükımetke Jastar bastamasy qoryn qūru mäselesımen jūmys ısteudı tapsyrdy.
«Jas Otan» bolaşaq saiasatkerler üşın ülken mektep bolyp tabylady. Sondyqtan da, jasotandyq deputattardy bilık organdaryna, jergılıktı mäslihattarǧa, Parlament deputattyǧyna tartu maŋyzdy bolatynyn da Prezident atap körsettı.
Sondai-aq, bolaşaqta Astanada zamanaui Jastar saraiy boi köteruı mümkın. Mūny da Elbasynyŋ özı ūsyndy.
Eldıŋ eŋ basty qūndylyǧy Täuelsızdık ekendıgıne airyqşa nazar audarǧan Memleket basşysy jastardy azat eldıŋ qadırın tüsınuge, bırlık pen tūtastyqty saqtauǧa, bılım men ǧylym üirenuge bar küş-jıgerlerın saluǧa şaqyrdy.
Osy sezde «Nūr Otan» HDP janyndaǧy «Jas Otan» jastar qanatynyŋ atqaruşy hatşysy bolyp sailanǧan Nūrlan Sydyqov köpşılıkke «Jas Otan» jastar qanatynyŋ 2020 jylǧa deiıngı «Jastar – Otanǧa» strategiiasynyŋ maqsat-mındetımen tanystyrdy.
– Bız aşyq aspan astynda qanat kergen qyrandai erkındıkte ösıp jatqan jas ūrpaq Qazaqstannyŋ qazırgı güldenuın, älem aldyndaǧy abyroily boluyn barlyǧyn sızben bailanystyramyz, qūrmettı Elbasy, – dep sözın bastady jıgerlı jas. – Armannyŋ kıltı – eŋbekte. Jastardy eŋbekke şaqyrǧan baǧdarlamalyq maqalaŋyzda eŋbekten qaşpauǧa, maŋdai termen jinaǧan yrysymyzdy şaşpauǧa şaqyrdyŋyz. Tättı nannyŋ aşy termen keletının ūǧyndyrdyŋyz. Arman men eŋbek ūştasa kele, keleşekke degen nyq senımdı qūraidy. Sol sebeptı de sezdıŋ basty ūstanymy – arman, eŋbek, senım.
Nūrlan Sydyqov tanystyrǧan «Jastar – Otanǧa» 2020 jylǧa deiıngı strategiiasynyŋ jobasyn elımızdıŋ tükpır-tükpırındegı jastar talqylapty. Ony oqyǧan är jas ūsynysyn aityp, pıkırın bıldırgen. Demek, būl qūjat küllı qazaqstandyq jastardyŋ ünı ıspettes. Mūnda qolǧa alynatyn şarualardyŋ 11 baǧyty aişyqtalǧan. «Jas Otannyŋ» jaŋa strategiiasy – ūzaq merzımdı maqsat-mındetterdı jariialau ǧana emes, eldı damytu salasyndaǧy jastardyŋ qosar ülesın aiqyndau.
Jiynda söz söilegen Soltüstık Qazaqstan oblysynan kelgen mūǧalım Äliia Şaraşeeva elımızde qolǧa alynǧan «Diplommen – auylǧa» baǧdarlamasy auyl üşın de, jastar üşın de paidasy mol joba bolǧanyn atap öttı. Sonymen bırge, baǧdarlama şeŋberınde auylǧa attanǧan özı siiaqty jastar sol eldımekennıŋ güldenuıne, äleumettık salasynyŋ damuyna aitarlyqtai üles qosyp jatqanyn jetkızdı.
Al, Şyǧys Qazaqstan oblysynan kelgen jastar belsendısı Erkebūlan Baltabekov 1991 jyly jarty ǧasyrǧa juyq uaqyt boiy synaq alaŋyna ainalǧan Semeide iadrolyq poligon jabylǧanyn aita kele, barşa adamzat üşın mänı men maŋyzy zor, elımızdıŋ bolaşaǧy üşın Elbasynyŋ jasaǧan būl şeşımıne küllı semeilıkterdıŋ atynan alǧysyn bıldırdı.
«Jas Otan» jastar qanatynyŋ ekınşı ret ötıp otyrǧan sezınde jastar ötkendı tarazylap, bolaşaqqa baǧdar jasady. Bır-bırımen ündes, pıkırles jas qazaqstandyqtar Elbasynyŋ saiasatyn qoldaityndaryn, özderıne artylǧan senımdı aqtap, abyroimen eŋbek etuge äzır ekendıkterın jetkızdı. Al «Jas Otan» jastar qanatynyŋ atqaruşy hatşysy bolyp bekıtılgen Nūrlan Sydyqov Prezident tapsyrǧan mındetterdı qaltqysyz oryndap, jaŋa strategiia qabyldaǧan «Jas Otandy» jaŋa beleske köteruge uäde ettı.
Alqaly jiynda «Jas Otannyŋ» Ortalyq keŋesı sailanyp, būrynǧy Jarǧyǧa özgertuler men tolyqtyrular engızıldı.
Sonymen, būl sezge qatysqan 9 myŋnan astam adam, elımızdıŋ tükpır-tükpırınen kelgen 1100-den astam delegat jäne jiyndy tıkelei efir arqyly tamaşalaǧan jamaǧat Qazaqstanda jastar qozǧalysy damuynyŋ jaŋa kezeŋı bastalǧanyna kuä boldy.
Qymbat TOQTAMŪRAT
