«JAS QANATTYŊ» JEŊIMPAZDARY
Beibıtşılık jäne kelısım saraiynda talai talanttyŋ esımın elge tanytqan «Jas qanat» respublikalyq baiqauy öttı. Aty aŋyzǧa ainalǧan saiys jyldaǧydan erek bolyp, 25 jyldyq mereitoiyn jūldyzdy baǧdarlamamen toilady.
İä, 2016 jyl – «Jas qanattyŋ» naǧyz mereilı şaǧy. Şirek ǧasyr ǧūmyrynda baiqau qazaq estradasynyŋ qalyptasuyna ölşeusız üles qosty. Osy uaqyttaǧy jobanyŋ jetken jetıstıgın – biylǧy «Jas qanattyŋ» qazylar alqasy däleldedı. Ümıtkerlerdıŋ önerın är kezdegı baiqaudyŋ jeŋımpazdary Nūrlan Abdullin, Erlan Kökeev, Baqyt Şadaeva, Mädina Saduaqasova, Janar Dūǧalova, Marjan Arapbaeva 15 baldyq jüiemen baǧalady. Al, jiurige Medeu Arynbaevtyŋ töraǧalyq etuınıŋ de özındık maǧynasy bar. Änşı 1992 jyldaǧy alǧaşqy «Altyn qanat» iegerı atanǧan edı. Sondai-aq, muzykatanuşy, belgılı telejürgızuşı Iýrii Aravin, qazaq sahnasynyŋ «Qyz Jıbegı» Nūrjamal Üsenbaeva, dirijer Abzal Mūhitdinov, hormeister Erjan Dautov, QR eŋbek sıŋırgen qairatkerı Raisa Mūsaqojaeva sekıldı öner maitalmandary 14 qatysuşynyŋ än oryndau şeberlıgıne qazylyq ettı.
Elımızdıŋ tükpır-tükpırınen kelgen 14 önerpaz saiys barysynda 3 ännen oryndady. Jartylai finalǧa 10 qatysuşy ötse, festivaldıŋ bas jüldesın alty finalist sarapqa saldy. Nätijesınde, semeilık Parasat Otan «Jas qanattyŋ» bas jüldesın jeŋıp aldy. Ol halyq änı «Jorǧataidy» oryndaǧandaǧy keŋ dauysymen köpşılıktı täntı qyldy.
«Kümıs qanat» – qaraǧandylyq «Üş jüz» tobyna, al qola jülde Oraldyŋ namysyn qorǧaǧan Aibek Däuletqalievke būiyrdy.
Sondai-aq, astanalyq Jalǧas Sūltanov ta jüldeden qūr qalmady. Ol «Habar» agenttıgınıŋ arnaiy syilyǧymen marapattalyp, «Jas qanat-2016» baiqauynyŋ diplomanty boldy. Astana qalasy äkımınıŋ orynbasary Ermek Amanşaev qala äkımı Ädılbek Jaqsybekovtyıŋ atynan 100 myŋ teŋgelık 3 «Ümıt syilyǧyn» Ernar Düiseev, Aqjol Saparaly men Aibergen Bolathanǧa tabystady. Sonymen qatar, Mädeniet, mūraǧattar jäne qūjattamalar basqarmasynyŋ jüldesın Mälika Ahmetjanova ielendı.
25 jyldyqtyŋ jaŋalyǧy da az emes. Irıkteuden ötuge azǧantai ūpaiy jetpei qalǧan 5 üzdık qatysuşyǧa baiqaudyŋ ekınşı turynda bır ännen oryndauǧa mümkındık tudy. «Armanǧa qadam» atalatyn būl bastamanyŋ jeŋımpazy bop tanylǧan elordalyq top «Astana Acapella» men Tamiris Janǧazinova «Jas qanat-2017» baiqauyna qatysuǧa tıkelei joldamany ūtyp aldy.
Üş künge jalǧasqan tartysty bäigenıŋ merekelık keşınde estrada änşılerı sahnada än aityp qana qoimai, «Jas qanattyŋ» ömırlerındegı maŋyzymen bölıstı. «Būl baiqauǧa menı qyzylordalyqtar oblys bolyp jıbergen edı. Ol kezde nebary 18-19 jastamyn. 1999 jylǧy jeŋısımnen keiın menı bırden äkımnıŋ qabyldauyna şaqyrtty. Ekı aidan keiın «Jyl adamy» syilyǧy berıldı. Odan bölek, maǧan äkımnıŋ premiiasy taǧaiyndaldy. Bır jyl boiy aqşa berılıp tūrdy. Astanadaǧy Prezidenttık orkestrden jūmysqa ūsynys tüstı. «Jas qanat» jas talantqa qanat bıtıredı, şabyt syilaidy, jıgerlendıredı» deidı Mädina Saduaqasova. Al Janar Dūǧalova atalmyş baiqau men «Turkvision-2014» saiysyndaǧy jeŋıs arasynda tylsym bailanys bar dep esepteidı:
«Bır qyzyǧy, men «Jas qanatty» 14 jasymda jeŋdım, tura 13 jyldan soŋ «Turkvision» 2014 jyly öttı. «Jas qanatta» men üşınşı jäne bırınşı bolyp sahnaǧa şyqsam, Qazan qalasynda jerebe tartqanda da maǧan 1-şı men 3-şı nömır tüstı. «Jas qanat» menı ösırdı, oǧan deiın men tek balalar konkurstarynda jüruşı edım. «Jas qanattan» keiın özımdı ülkender de moiyndai bastady» deidı.
Änşınıŋ aituynşa, 25 jyldyq tarihy bar, qazaq estradasynda eleulı oryn alatyn saiys – televiziialyq joba bolǧandyqtan, oǧan bügınde internet keŋıstıgıne şyǧuǧa qoldau qajet.
«Nege «Jas qanat» baiqauynyŋ ırıkteuın är qalada kasting jasap ötkızbeske?» degen sūraǧymyzǧa jobanyŋ negızın qalauşy, tanymal prodiuser Mūrat Erǧaliev:
– Önerpazdardan kende emespız. «Jas qanattyŋ» formaty bölek, deŋgeiı joǧary. Bızdıŋ konkursqa talai halyqaralyq festival, bäigelerdıŋ jeŋımpazdary qatysyp keledı. Halyqtan sms-dauys jinap, eldıŋ nazaryn özıne qaratyp, keiınnen ız-tüssız joǧalyp ketetın arzanqol dünie emes būl. Kögıldır ekrannan tüspei jürgen änşılerden de talantty on, tıptı jiyrma jas oryndauşynyŋ esımın jatqa aityp bere alamyn.
«Chip-chip», «qyzyl örık» dep şulap jürgen zamanda diapazony keŋ, daryndarymyz tasada qalyp jatady, ökınşke qarai. Olarǧa tek mädeni saiasatpen ainalysatyn janaşyrlar tarapynan, memleket tarapynan qoldau tabylsa eken deimız, – dep özındık pıkırın bıldırdı.
Mädina JAQYP