Nūr-Sūltanda sybailas jemqorlyqty jeŋ ūşynan jalǧastyruǧa jaqyn salalar belgılı boldy. Äsırese, para alu deregı boiynşa köş basyn qūqyq qorǧau oryndary bastap tūr.
Sybailas jemqorlyqqa qarsy ıs-qimyl agenttıgınıŋ Nūr-Sūltan qalasy boiynşa departamentı basşysy Şyŋǧys Qabdula ötkızgen brifingte jyl basynan berı 95 qylmys tırkelgenı aityldy. Onyŋ ışınde üşeuı asa auyr, 48-ı auyr jäne 61-ı – sybailas jemqorlyq sipatyndaǧy qylmystar.
Al salaǧa qarai sipattasaq, tırkelgen qylmystar basynda 28 jaǧdaimen qūqyq qorǧau oryndarynyŋ qyzmetkerlerı tūr. Mūnan keiın 10 faktımen densaulyq saqtau salasy. Energetika salasy boiynşa – 8, qūrylys salasy boiynşa 6 jaǧdai tırkelgen.
Barlyǧy 47 adam qylmystyq jauapkerşılıkke tartyldy, onyŋ ışınde 3 respublikalyq jäne 2 qalalyq deŋgeidegı basşylyq qyzmettegı azamattar bar, – dedı brifing barysynda Ş.Qabdula.
Jemqorlyqqa jaqyn tızımde bılım beru salasy da bar. Osy jyly departament qyzmetkerlerı bır milliard teŋge mölşerınde qarjy jymqyru äreketınıŋ jolyn kesken. «Pandemiia kezınde balalardy qaşyqtan oqytuǧa arnalǧan 22 myŋ 650 planşettı jetkızu boiynşa sotqa deiıngı tergeu barysynda milliard teŋge kölemınde qarajat jymqyru faktılerı anyqtaldy. Zalal tolyq kölemde öteldı. Bılım jäne ǧylym ministrlıgıne qylmys jasauǧa yqpal etken sebepter men jaǧdailardy joiu turaly ūsynys engızıldı» dedı brifing barysynda departament basşysy.
On ai ışınde tırkelgen sybailas jemqorlyq derekterıne qatysty qylmystardyŋ 40 paiyzdan astamy memlekettık organdarǧa tiesılı.
