JOL EKI APTAǦA JABYLADY
Jylumen qamtamasyz etu jüiesın qaita jaŋǧyrtu jūmystaryna bailanysty Kenesary köşesınıŋ Beibıtşılık jäne Jeltoqsan köşesıne deiıngı kölık qozǧalysy ekı aptaǧa jabyldy.
Atalmyş köşelerde qyzu eŋbek bastalyp kettı. Astana qalasy Energetika jäne kommunaldyq şaruaşylyq basqarmasy bastyǧynyŋ orynbasary Ermekbai Sätemırovtıŋ aituynşa, jaŋartu barysynda dizoliasiialanǧan qūbyrlar qoldanylmaqşy. Olardyŋ diametrı 300 mm-den 500 mm-ge ūlǧaitylyp, tiımdı jylu jabdyqtarmen qamtamasyz etu közdelgen. Qūbyrlardyŋ jylu ötkızu qabıletın ūlǧaitumen qatar, ziiandylyǧyn tömendetu qarastyryluda. Atalmyş jūmystardy jürgızudı «Astanainjkomstroi» merdıgerlık ūiymy qolǧa alǧan. Bügınde 7 qūrylys tehnikasy men 20-dan astam bılıktı maman jylu jüiesın jaŋartu üşın bılek sybana kırısıp kettı.
Astana qalasy IID Jol polisiiasy basqarmasy qala tūrǧyndary men qonaqtaryna balama qozǧalys baǧyttarymen jürudı ūsynuda. Jol baqylau bölımınıŋ bastyǧy Nūrlan Uvaev jol belgılerın jäne jol polisiiasy qyzmetkerlerınıŋ talaptary men nūsqaularyn qataŋ saqtau kerektıgın alǧa tartty. 31-tamyzǧa deiın jalǧasatyn qūrylys jūmystaryna bailanysty būl baǧytta qatynaityn №1, 9, 17, 18, 23, 25, 31, 32, 37, 47, 112 avtobustar endı Kenesary – Respublika daŋǧyly – Abai – Jeltoqsan – Kenesary köşesıne şyǧyp, odan ärı būrynǧy marşrutymen jüretın bolady.
Gülmira AIMAǦANBET