Astana qalasy Qoǧamdyq keŋesınıŋ otyrysynda şahardyŋ jylytu mausymyna daiyndyǧy, oǧan daiyndyq barysynda jasalǧan jūmystar turaly qalalyq Otyn-energetika keşenı jäne kommunaldyq şaruaşylyq basqarmasy basşysynyŋ orynbasary Rüstem Zakarin baiandady.
Onyŋ aituynşa, 1-JEO, 2-JEO, audandyq qazandyqtar, jylu jelılerı, elektr jelılerı sekıldı energiia közderınıŋ jalpy daiyndyǧy – 96 paiyz. Bılım nysandary – 100 paiyz, densaulyq saqtau nysandary – 90 paiyz, mädeni nysandar – 98 paiyz, al tūrǧyn üiler 94 paiyz jylytu mausymyna daiyn.
Jylytu mausymyna daiyndyq barysynda 1-JEO-da №4 jäne №9 su jylytu qazandyqtary, 2-JEO-da bırınşıden segızınşıge deiın energetikalyq qazandyqtary, bırınşıden altynşyǧa deiın turboagregattar jäne №2, 3, 4 su jylytu qazandyqtary jöndeldı. Qazır 1-JEO jylytu mausymyna tolyqtai daiyn, al 2-JEO-nyŋ daiyndyǧy 96,1 paiyzdy qūraidy. Mūnda №5 qazandyqty kürdelı jöndeu jäne №4 turboagregatty aǧymdaǧy jöndeu jürgızılıp jatyr. Qazandyq 15 qazanda, turboagregat osy aptanyŋ aiaǧyna deiın jöndelıp bıtuı tiıs.
Jylu-elektr ortalyqtarynda kömır qory – 492 myŋ tonna, mazut – 3 myŋ tonna. «Promyşlennyi», «Prigorodnyi», «UPTK», «Jeleznodorojnyi», «Michurino», «İnternasionalnyi» tūrǧyn alaptaryndaǧy audandyq qazandyqtar da otynmen qamtamasyz etıldı.
«Astana-Teplotranzit» AQ-tyŋ jylu jelılerı 99 paiyzǧa, «Astana-REK» AQ-tyŋ elektr jelılerı 91,4 paiyzǧa, «Astana su arnasy» MKK su jelılerı 100 paiyzǧa, «Astana-Örnek» JŞS-tıŋ avtonomdy qazandyqtary 100 paiyzǧa daiyn.
Elordany gazdandyru jalǧasyp jatqanyn aitqan baiandamaşy gaz taratu jelılerınıŋ 680 şaqyrymy salynǧanyn jetkızdı. Almaty jäne Saryarqa audandaryndaǧy 10 tūrǧyn alapta gaz jelılerı tolyǧymen salyndy. Nätijesınde 200 myŋ astanalyq gazben qamtu jüiesıne qosyluǧa qol jetkızdı. Biyl Baiqoŋyr jäne Esıl audandaryn gazdandyru bastaldy. Bügınde 14 myŋ abonent gazǧa qosyldy. 1-JEO jäne 2-JEO-daǧy barlyq 16 su jylytu qazandyqtary gazǧa köşırıldı. 20 äleumettık nysandy gazǧa qosu jūmystary aiaqtaluǧa jaqyn.
Elordada qazır 14 orynda kömır satumen 8 negızgı kompaniia ainalysady. Barlyq kompaniiamen baǧany ösırmeu turaly memorandum jasaldy. Jyldaǧy josparǧa sai qyrküiek-qaraşa ailarynda ai saiyn kömırdıŋ 70 myŋ tonnasyn qalaǧa jetkızu jospary jasaldy.
Otyrys kün tärtıbıne memlekettık körsetıletın qyzmetterdı jetıldıru, Astana qalasynyŋ rämızderıne özgerıs engızu, Prezident sailauyna bailanysty ümıtkerlerge ügıt jūmystaryn jürgızu üşın baspa materialdaryn ornalastyruǧa jäne sailauşylarmen kezdesu ūiymdastyruǧa oryndardy beru mäselelerı de şyǧaryldy.
Qalalyq Tılderdı damytu jäne arhiv ısı basqarmasynyŋ basşysy Säken Esırkeptıŋ mälımdeuınşe, qalanyŋ Astana dep qaita ataluyna bailanysty elordanyŋ eltaŋbasy men tuyndaǧy «Nur-Sultan» degen söz «Astana» degen sözge auystyrylady. Özgerıs sol ǧana. Al Astana qalasy äkımı apparaty basşysynyŋ orynbasary Janasyl Şäukentaev qala halqynyŋ artuyna bailanysty ümıtkerlerdıŋ sailauşylarmen kezdesu ötkızu oryndary 60-tan 70-ke artqanyn jetkızdı.
