Мерейтойға мәслихаттың үлесі
Қалалық мәслихат депутаттары Астананың 20 жылдық мерейтойына қаланың сәулет стиліне сай келетін шыныдан жасалған атаулы орындықтар тарту етті. Бұл орындықтар барлық аудандарда орнатылды.
«Елорданың болашағына бейжай қарамайтын адамдар шаһарға атаулы орындықтар сыйлауды дәстүрге айналдырған. Бүгіндері әртүрлі пішіндегі осындай ондаған орындықтар айналасының көркін аша түскен. Бұл үрдістен мәслихат депутаттары да сырт қалмай, сүйікті қаламыздың мерейтойына сый жасап отыр. Астана жылдан-жылға қарқынды дамып келе жатыр. Инфрақұрылым жақсарып, қала ажарланып келеді. Шаһар тұрғындары мен қонақтарының демалуына арналған мұндай орындықтар баршаны қуантады деген ойдамыз. Қаланың әр тұрғыны бұл жасампаз жобаға үлесін қоса алады» дейді қалалық мәслихат хатшысы Жанат Нұрпейісов.
Адамдар көп жүретін жерлерде орнатылған атаулы орындықтар қала тұрғындары мен қонақтарының көңілінен шығып отыр. Олар Сарыарқа ауданындағы халық жиі серуендейтін «Арбатта», Алматы ауданындағы Жалайыри көшесіндегі гүлбақта, Байқоңыр ауданындағы Жастар сарайының алдында, Есіл ауданындағы «Астана-Бәйтерек» монументі алаңында орын тепті.
Атаулы орындықтарды Астана қаласымен бірге биыл 20 жылдығын атап өтетін «АЛКОН+» ЖШС жасап шықты. Олар «триплекс» аталатын сынбайтын шыныдан жасалды, қандай соққыға да төтеп береді. Бұған қоса, орындықтарға QR-коды таңбаланды. Сондағы сілтеме арқылы қалалық мәслихаттың сайты мен Facebook әлеуметтік желісіндегі парақшасына өтуге болады.