Мерекеде туғандар марапатталды
Әкімдік өкілдері елордада осымен оныншы рет 1 желтоқсанда туған сәбилердің аналарын құттықтады. Қала әкімінің орынбасары Асхат Оралов пен Қоғамдық денсаулық сақтау басқармасының басшысы Тимур Мұратов құттықтауды №2 көпбейінді қалалық аурухананың акушерлік блогынан бастады.
Қалалық ауруханалардың акушерлік блогында 30 қарашадан 1 желтоқсанға қараған түні барлығы 27 сәби дүниеге келді. Оның 16-сы – қыз, 11-і – ұл. Бақытты аналарға қала әкімі Алтай Көлгіновтің атынан алғыс хаттар және нәрестелерге арналған комбинезон түріндегі сыйлықтар табыс етілді.
«Сіздерді сәбидің дүниеге келуімен және 1 желтоқсан мерекесімен шын жүректен құттықтаймын! Бүгін – сіздер үшін қос мереке. Сіздерге және балаларыңызға зор денсаулық, бақыт пен отбасыңызға амандық тілеймін. Бүгінгі туған сәбилер еліміздің бетке ұстар азаматтары болсын!» деп құттықтады әкім орынбасары А.Оралов.