МҮГЕДЕК ЖАНДАР КӨМЕККЕ МҰҚТАЖ
Қазақ саңыраулар қоғамының астаналық филиалында мүгедек әйелдерді әлеуметтік қорғау шараларын талқылаған дөңгелек үстел отырысы өтті.
Мүмкіндігі шектеулі жандардың, соның ішінде мүгедек әйелдерді жұмыспен қамту – қоғамның өзекті мәселелердің бірі. Бүгінгі таңда астанада 18666 мүгедек тіркелген, оның 8695-і әйелдер. Олардың ішінде еңбек етуге қабілетті екі мыңға тарта азаматтардың тең жартысы нәзік жанды азаматтар.
Әр адамның еңбек етуге қақы бар. Алайда, жұмыс берушілер мүмкіндігі шектеулі азаматтарды жұмысқа алуға аса құлықты емес. Оның бір себебі – олардың осы санаттағы жандармен жұмыс істеу тәжірибесі кемдігі болса, екіншісі – мүгедек жандарға қолайлы жұмыс орнын ұйымдастырудың қиындығы тағы бар.
Қалалық мәслихат депутаты Қаршыға Құлмұханов, «ДОС» тәуелсіз өмір орталығы» қоғамдық бірлестігінің төрайымы Дина Ерділдинова, «Қазақстан әйелдер кеңесі» астаналық филиалының жетекшісі Ханзада Балтаева, Бақылау және әлеуметтік қорғау департаментінің басшысы Дәмежан Сәдуақасова жұмыссыз әйелдерге қатысты тұрғысында қордалы мәселелердің шешімін табу бағытында бірлесе әрекет етудің тиімділігін алға тартты.
Жұмыспен қамту және әлеуметтік бағдарламалар басқармасы басшысының орынбасары Ольга Демушкан мүгедектерді әлеуметтік оңалту бағдарламасы шеңберінде атқарылған жұмыстарға тоқталып өтті. Ол жұмыссыз әйелдердің басым бөлігі әлеуметтік көмекке аса мұқтаждардың санатына жататынын айтты. Отбасында мүгедек бала тәрбиелеп отырған көп балалы аналар, көп уақыт бойында жұмыстан қол үзіп қалған зейнеталды жасқа жеткен әйелдерге әлеуметтік көмектің аса қажеттілігін айтты.
Айгүл УАЙСОВА