Аязы бет қаритын Астанада қыстың көркі мұз қалашығымен енеді. Жақында шаһардағы бас шыршаны қоршай орналасқан мұздан салынған сарай салтанатты түрде ашылды.
«Ханшатырдың» іргесіндегі бұл қалашық – мұзды ғимараттардың алғашқысы. Қазір мұнда қызықтап келіп жатқан жұрттың қатары күн санап артуда.
Мұз құрсанған қалашықтың қақпасына осындағы ертегі әлемінің «елтаңбасындай» болып «ЕХРО-2017» көрмесі мен «Тәуелсіздіктің 25 жылдығы» логотиптері қашалыпты. Сондай-ақ, смартфондардың сәні мен мәні болған әлеуметтік желілердің белгілері де осы жерде бедерленген.
Табалдырығынан аттап басқаннан қиял әлемінің таңғажайып кейіпкерлеріне тап боласыз. Мәз-мейрам болған кішкентайлардың назары алдымен осы мультфильм батырларына ауады. Бұл маңдағы басты бейне – жаңа жылдың жаршысындай болған алып қораздың мұз мүсіні.
Әуес көріп жүгірген жас балалардың ермегі – сырғанақтар. Қалашықта ең ірі екі сырғанақ сарайы салыныпты. Оған қоса, мұз үстінде зырғығысы келетіндер үшін конькилерді жалға беретін дүңгіршектер құрылған.
– Мұз қалашықтың салынғаны жақсы болды. Енді екі қызымды демалыс күндері осында жиі әкеліп тұрамын. Өздері ойын қызығына кіріп кеткенде жаурағандарын да білмейді. Тек қана сырғанау үшін ғана емес, серуен құрып келгендер үшін отбасылық демалысқа таптырмайтын орын деп ойлаймын. Жаңа жылдың қарсаңында неше түрлі мерекелік шаралар болатынынан құлағдар болдық, – деді қала тұрғыны Сержан Тәңірберді.
Шынында да бұл жерде мереке күндері елордалықтар мен меймандардың уақытын көңілді өткізу мақсатында арнайы бағдарламалар әзірленбек. «Astana Winter Fest» шарасының шеңберінде концерттер, эстафеталар және түрлі флешмобтар ұйымдастырылады.
Сонымен қатар, тағы үш негізгі мұз қалашық ашылады. Олар қалалық әкімдіктің алдындағы алаңда, Есіл өзенінің жағасында және «Студенттер» паркінде орналасады. Ал жалпы қала бойынша ірілі-ұсақты жеті мұз сарай салынады. Олар 11 сырғанақпен және 37 шыршамен жабдықталады.
Аталған саябақтың аумағындағы және Есіл өзенінің жағалауындағы мұз қалашықтары желтоқсан айының 25-інде пайдалануға беріледі.
– Осы жылға дейінгі тәжірибе мұз қалашықтары қысқы уақытта бұқараның ең көп жиналатын орны екенін көрсетті. Соған байланысты ағымдағы жылы келушілер үшін думанды бағдарламалардың санын көбейттік. Оның ішінде концерт, түрлі спорт сайыстары, мәнерлеп сырғанаудан шеберлік сабақтары, флешмобтар, жәрмеңкелер, спортшылардың өнер көрсетуі – бәрі бар. Мұның барлығы ең алдымен саламатты өмір салтын насихаттайды, – дейді қалалық Мәдениет басқармасының баспасөз хатшысы Мира Молдахметова.
Ал жаңа жыл тойланатын түні сағат 21.00-ден бастап 03.00-ге дейін «Ханшатыр» мен қалалық алаң маңайында үлкен концерт өтпек.
Орынбек ӨТЕМҰРАТ
