Тұрғын үй – тұрақты назарда
Қалалық мәслихат ұйымдастырған «Депутат күні» шеңберінде Астана қаласының Коммуналдық мүлік және мемлекеттік сатып алу басқармасы мен Тұрғын үй басқармасы басшыларының есебі тыңдалды.
Құрылғанына екі жыл ғана болған «Астана қаласының Коммуналдық мүлік және мемлекеттік сатып алу басқармасы» мемлекеттік мекемесі – коммуналдық мүлікті иелену, пайдалану және басқару уәкілеттігі бар, сонымен қатар елордадағы мемлекеттік сатып алуды бірыңғай ұйымдастырушы қызметін жүзеге асыратын атқарушы орган болып табылады.
Басқарма басшысының айтуынша бүгінгі күнде 375 коммуналды меншік тіркелген. Оның ішінде – 147 мемлекеттік мекемелер, 155 мемлекеттік коммуналды қазыналық кәсіпорын, 38 мемлекеттік коммуналды кәсіпорын, 9 акционерлік қоғам және 26 жауапкершілігі шектеулі серіктестік бар. Басқарма басшысы Е.Өтебаев басқарма алдындағы Астана қаласының коммуналдық мүлкін басқару, бас қаланың коммуналдық мүлкін мүліктік жалдауға (жалға беру), әкім айқындайтын бюджеттік бағдарламалар немесе тауарлар, жұмыстар, қызметтер бойынша бірыңғай мемлекеттік сатып алуды ұйымдастыру және өткізуді қамтамасыз ету және әкімдік бойынша мемлекеттік сатып алуды жүргізу рәсіміне мониторинг жүргізу сияқты қызметтердің атқарылу барысынан толық ақпарат берді.
Баспана кезекпен беріледі
Астаналықтарға жайлы баспананың қолжетімділігі туралы тақырыпқа баяндама жасаған Тұрғын үй басқармасы басшысы Р.Ахметов жекелеген тізімдер бойынша коммуналдық тұрғын үй қорынан тұрғын үйге мұқтаж азаматтар есебін санамалап көрсетті. Бұлар Ұлы Отан соғысының мүгедектері мен қатысушылары, жетiм балалар, ата-анасының қамқорлығынсыз қалған балалар, халықтың әлеуметтiк жағынан осал топтары (Ұлы Отан соғысының мүгедектері мен қатысушыларына теңестірілген адамдар, 1 және 2 топтағы мүгедектер) және қолданыстағы заңнамада көрсетілген басқа да нысанды топтар өкілдері.
Сонымен бірге мемлекет есебінен мемлекеттiк қызметшiлер, бюджеттiк ұйымдардың қызметкерлерi, әскери қызметшiлер, ғарышкерлерге, ғарышкерлікке кандидаттар, арнаулы мемлекеттік орган қызметкерлеріне және мемлекеттiк сайланбалы қызмет атқаратын адамдар да тұрғын үй алуға құқығы бар. Тұрғын үйі апаттық жағдайда деп танылған азаматтар да кезеккке тұра алады.
Бүгінгі таңда коммуналдық тұрғын үй қорынан тұрғын үйге мұқтаждылар кезегі 42 000-нан артық адамды құрайды екен. 2015 жыл үшін кезектегілерді тұрғын үймен қамтамасыз ету үшін әкімдікпен 373 пәтер, ағымдағы жылдың өткен аралығы үшін 93 пәтер берілген.
Сонымен қатар, Өңірлерді дамытудың 2020 жылға дейінгі Бағдарламасы аясында жыл сайын «Қазақстанның тұрғын үй құрылыс жинақ банкі» АҚ желісі бойынша тұрғын үй, «Қазақстандық ипотекалық ұйым» ИҰ» АҚ тұрғын үйі, «Самұрық Қазына» Жылжымайтын мүлік қоры» АҚ тұрғын үй бағыттары бойынша коммуналдық тұрғын үй қорынан тұрғын үйге мұқтаждылар есебінде тұрған азаматтарды тұрғын үймен қамтамасыз ету жүргізілген.
Апатты үйлер бұзылады
Оған қоса, басқарма қызметінің маңызды бағыты – апатты тұрғын үйлерде тұратын азаматтардың баспана мәселесін жақсарту болып табылады. Осы мақсатта Астана әкімдігімен апатты тұрғын үйлерді бұзып алу бойынша пилотты жоба жасалған. Аталған бағдарламаға сәйкес, тұрғындарға жаңа пәтерлер беру ескі баспанасындағы ауданына лайықтап, «шаршысына шаршы» түрінде жүзеге асырылатын болады.
2017 жылдың аяғына дейін негізгі құрылыстық құрылымдары мен инженерлік желілері жоғары деңгейде ескірген, 1940-1970 жылдарда салынған 228 апатты үй құрылысын (3 361 пәтер) бұзып, онда тұратын 3500 отбасын көшіру жоспарланған. Бүгінгі таңда 117 апатты үйлердің тұрғындары жаңа жабдықталған пәтерлерге көшірілген. Тағы да жүзден астам апатты тұрғын үйдің тұрғындарына келесі жылдың аяғына дейін жоспарға сәйкес көшірілетіні туралы хабардар етілген.
Айгүл УАЙСОВА