Рысгүл ҚАУҒАБАЕВА, Астана қаласы Кәсіпкерлік және өнеркәсіп басқармасы бастығының орынбасары:
– Ұлыстың ұлы күні – Наурызды мерекелеу биыл бұрын-соңды болмаған өзгеше жағдайда өткізілмек. Ерекшелігі, елордалықтарды мерекемен құттықтауға еліміздің 8 аймағы келмек. Атап айтсақ, олар – Павлодар, Алматы, Ақмола, Қостанай, Солтүстік Қазақстан мен Оңтүстік Қазақстан, Қарағанды облыстары мен Алматы қаласы. Сондай-ақ, «Қазақ елі» монументінің алдындағы алаңда өтетін жәрмеңкеге Астананың 14 кәсіпорны қатысып, өз өнімдерін көпшілік назарына ұсынбақ. Қалалық әкімдіктің алдындағы орталық алаңда да үлкен мерекелік шара ұйымдастырылады.
– Жәрмеңкеде қандай өнімдер сатылады? Әрі оған келген қонақтарға арнайы мерекелік шара ұйымдастырылады ма?
– Аталмыш жәрмеңкеге 8 өңірден 150 тоннадан астам өнім жеткізіледі. Оның ішінде ауылшаруашылық және жергілікті кәсіпорындар тауарлары арзан бағамен сатылады. Мәселен, қарағандылықтар «Топар» жылыжайында өсірген көкөністерін арзан бағамен сатады. Ол – экологиялық таза өнім. Сондай-ақ, Қостанайдың «Деп» шаруашылығы әкелетін сүт өнімдері, ұн, ет бағалары онша қымбат емес. Бұлардан бөлек әр аймақтың елордалықтарға арнайы тартуы бар. Олар – концерттік бағдарламалар мен спорттық жарыстар.
Жалпы, мұндай жәрмеңке қала тұрғындары үшін таңсық емес. Себебі, бұған дейін де бірнеше мәрте өткізілген болатын. Мерекенің тағы бір ерекшелігі – сауда дүңгіршектері күмбезді болады. Алаңға келген астаналықтар мен қонақтар бауырсақ, наурыз көже мен палаудан дәм тата алады.
– Айтыңызшы, қала базарлары мен ойын-сауық орталықтарының Наурызға дайындығы қалай?
– Әлбетте, еліміздің төл мерекесін мерекелеуге қаланың ойын-сауық орталықтары мен базарлары да зор үлесін қоспақ. Мәселен, бүгін «Шапағат» коммуналдық базары Наурыз тойын жасап жатыр. Сол сияқты басқа да ұжымдар қарап қалмасы анық.
Айнұр ШОШАЕВА
