Қараөткелден түлеген ҚАҺАРМАН
Қаламы қарымды журналист Болат Жүнісбековтің «отАсу» деген кітабы қолымызға тиісімен асыға парақтап, оқып шыққанбыз. Армия генералы Сағадат Нұрмағамбетовтің ғұмыр жолындағы ерлігін, жігерін, сын сағаттардағы шешімдері мен сезімдерін паш еткен роман-дилогия жайында түйген ойымызды қағазға түсіріп, уыз қалпында оқырман назарына ұсынғанымыз соңғы сейсенбі ғана еді… Күн сәскеден аспастан «Алаш баһадүрінен айырылды» деген қаралы хабар тарады.
Құзар шың басынан айналасына байыппен көз тастай қомданған қыран тектес ағаның асыл бейнесі көз алдымызға келе берді сосын. «Ұлтқа қызмет етудің құны – адалдық» деген асыл ағаның бейнесі… «Қазақ – жауынгер халық! Біз сияқты асқақ рухты жігерлі халық жоқ! Сол соғыста жан аямай күрескен тек қазақтар болды! «Известия» газетінде тек қазақтардың ерлігі, жігері жазылатын» деп, ағынан жарылған асыл ағаның бейнесі…
Тоқсан жасына қараған шағында бақиға аттанған Сағадат Қожахметұлы Арқаның топырағында – Астананың іргесіндегі Еңбек ауылында (қазір Ақмола облысы Ақкөл ауданы) туыпты. Кәдімгі Қараөткелден түлеген, қанат қаққан. Кәмелетке толған күннен өмірінің соңғы сәтіне дейін Отанына бар ынта-шынтасымен қызмет етті. 1942 жылы адамзат тарихындағы ең сұрапыл соғысты Солтүстік Кавказда бастап, өзі басқарған атқыштар батальонымен жауды Берлинге дейін қуды. Ұлы Отан соғысынан кейін арамызға Кеңес Одағының Батыры болып оралды.
Сағадат Нұрмағамбетов Қарулы күш-
тер қатарында Азаматтық қорғаныс штабының бастығы, Орта Азия әскери округының қолбасшысының орынбасары, Венгриядағы әскери контингент басшысының бірінші орынбасары, Қазақ ССР-і мемлекеттік Қорғаныс комитетінің төрағасы қызметтерін абыроймен атқарып, 1992 жылы тәуелсіз Қазақстанның бірінші қорғаныс министрі лауазымына тағайындалады. Армия генералы атанып, құрметті демалысқа шыққан баһадүр күні кешеге дейін Президенттің кеңесшісі қызметін атқарды. 1994 жылы Қазақстан Республикасы Президентінің
Жарлығымен нөмірі бірінші «Халық қаһарманы» орденімен марапатталады. 1999 жылы елордада ашылған «Жас ұлан» республикалық әскери мектебіне Сағадат Нұрмағамбетовтың есімі берілді. Ал, оның көптеген ордендерінің арасында Украина, Польша, Чехия, Монғолия елдерінің ең жоғары марапаттары бар.
«Қазанаттың ері ауды, қайтейік…»
аһ ұрамыз да, қайғырамыз да, аза тұтамыз да. Алайда, асыл ағаның бейнесі, ерлігі, кісілігі ұрпақ жадынан өшпейтіні тағы ақиқат!
Әділбек ЖАҚСЫБЕКОВ, Қазақстан
Республикасы қорғаныс министрі:
Бұл – бүкіл Қазақстан үшін орны толмас қаза.
Біз ұстазымыздан әрі сенімді досымыздан айырылдық. Сағадат
Қожахметұлы Қазақстан Қарулы Күштерінің тарихында аңызға айналған тұлға ретінде қалады.
Махмұт НӘЛІБАЕВ, С.Нұрмағамбетов атындағы халықаралық қордың төрағасы:
Сағадат – адамзаттың эталоны.
«Ұлт мақтанышы» деп аталатын мұрағат құжаттары бойынша жұмыс істеп, батырды бірнеше қырынан таныдық. Алғашқылардың бірі болып, жаудың ғимаратына енгендігін анықтадық. Екінші мәрте Кеңес одағы батыры ор-
деніне ұсынған құжаттарды таптық.