Сапалы көліктер сап түзеді
Астанадағы «Көрме» кешенінде «Astana International Auto Salon – 2013» (AIAS-2013) бірінші халықаралық автөкөлік көрмесі ашылды. Үлкен екі залда қатар басталған бұл шараны Индустрия және жаңа технологиялар министрлігінің, «KAZNEXINVEST» экспорт және инвестициялар ұлттық агенттігінің, сондай-ақ, «NADLoC» жергілікті құрамды дамыту жөніндегі ұлттық агенттігінің қолдауымен «Expo Group» халықаралық көрме компаниясы ұйымдастырып отыр.
Көрменің басты мақсаты – авто-көлік жасап шығарудағы жетістіктерді көрсетіп, әріптестікті дамытуға халықаралық деңгейде жайлы жағдай жасау және қазақстандық нарықтың стратегиялық маңызды мәселелерін шешу үшін шетелдік әрі отандық автокөлік өндірушілеріне Еуразия аймағының орталығында айрықша тұғырнама ұсыну. Сондықтан оған Германия, Жапония, Чехия, АҚШ, Ресей, Корея және Қазақстанның ірі компаниялары қатысып, жиналған көпшілікке өзекті трендтер мен әлемдік автоөндірушілердің жаңа өнімдерін ұсынды.
Қос залдың біреуіне өзімізде құрастырылатын «Ssаng Yong», «KIA», «Skoda» және тағы басқа да жаңа маркалы автокөліктердің үлгілері қойылса, екінші залда «Reno», «Mitsubishi», «Ford» және «Volkswagen» сынды компаниялардың шығарылымдары сап түзеген. Ондағы нақты тақырыптық бөлімдер автокөліктер, автокөлік тіркемелері, автоүйлер, үлкен және шағын автобустар, мототехника, көліктерге арналған қосалқы бөлшектер, шиналар мен дискілер, аккумулятор батареялары, автоэлектрика, автохимия, автокосметика, автоаксессуарлар, күзет кешендері және GPS-навигация, тюнинг, жол құрылысы, тағы басқа деп жалғаса береді. Көрмедегі айрықша уақиға – елімізде алғаш рет i-MiEV (MITSUBISHI Innovative Electric Vehicle) экологиялық таза және шусыз инновациялық электрмобильдің ресми тұсаукесері болды.
Ғали ТӨЛЕК