Рәмізге құрмет – еліңе құрмет
Бейсенбі күні Астана қаласы әкімінің орынбасары Аида Балаеваның төрағалығымен Қазақстан Республикасы Мемлекеттік рәміздері жөніндегі комиссияның кезекті отырысы өтті.
Жиында мемлекеттік рәміздерді пайдаланудағы заң бұзушылықтар жөнінде кеңінен сөз болды. Алдымен Алматы ауданы әкімінің орынбасары Түсіп Рыспеков өз аумақтарындағы мекемелер мен ұйымдардың мемлекеттік рәміздерді қолданудағы кемшіліктері жөнінде айтты. Аудан әкімдігі осыған байланысты ұдайы тексеру жүргізіп отырады екен. Жақында жүргізген рейдте «TENGRI» қонақ үйі мен «Толқын» спорт кешені ғимараттарында мемлекетіміздің Елтаңбасы мен Туы ілінбегені және Мичурин тұрғын үй алабында орналасқан «Астана-Өнім» АҚ-ндағы мемлекеттік нышандар ережелерге сәйкес келмейтіндігі анықталған. Мекемелерге жасалған ескертуден кейін кемшіліктер дереу жөнделген.
Ал Есіл ауданы бойынша жүргізген тексерудің нәтижесін баяндаған аудан әкімінің орынбасары Гүлнәр Қасенова елдігімізді айшықтайтын нышандарымызды қолдану барысында «Думан» қонақ үйі, «Хайвил Қазақстан» компаниясы, «Қазақтелеком» АҚ сынды бас-аяғы тоғыз мекемеде заң бұзушылықтар анықталғанын атап өтті. Ал «Юнус Эмре» атты түрік мәдениет орталығы заңды қоныштан басып, Мемлекеттік туымыздың өлшемін өз білгендерімен жасап алыпты.
Бұдан кейін Сарыарқа ауданы аумағындағы мемлекеттік рәміздерді қолдану жайы сөз болып, аудан әкімінің орынбасары Сәуле Нұрғожина қыркүйек айында жүргізіліген тексеруде төрт заңсыз дерек байқалғанын жеткізді.
Жиында Астана қаласы әкімінің орынбасары Аида Балаева мемлекеттік рәміздерді құрметтеу – елге деген құрмет екендігін, сондықтан тексерулерді күшейтіп қана қоймай, алдын алу шараларын да қарастыру қажеттігін қадап айтты.
Комиссия мүшелері мемлекеттік рәміздерді қолданудың тәртібін жұртшылыққа кеңінен түсіндіру үшін халықпен тығыз байланыстағы зиялы қауым өкілдерімен кездесу өткізетін болып келісті.
Қымбат ТОҚТАМҰРАТ