Бірер ай бұрын Астана әкімдігінің бастамасымен 1 млн теңгенің тұрғын үй жарнасы дәрігерлерге, полицейлерге және мұғалімдерге, яғни бас-аяғы 90 қызметкерге тапсырылған болатын. Жақында осы жеңілдік бойынша «Тұрғын үй құрылыс жинақ банкі» (ТҚЖБ) арқылы пәтер алғандардың алғашқысы қоныс тойын тойламақ.
Тұрғын үй сертификатын алушылардың тізімін қала әкімдігі әзірлеген. Ал оның басты талабы мамандардың Астанада баспанасы болмауы, алайда тұрақты тіркеуде болуы, сондай-ақ аталған банктің салымшылары болуы шарт етіліпті.
– Қала әкімдігі қызметкерлердің баспаналы болуы үшін қосымша 2 млрд теңге бөлуді жоспарлап отыр. Бұл олардың ең төменгі бастапқы жарнасын, яғни 20 пайызын жинауына септігін тигізеді. Ал ары қарай банк жылдық 7 пайыз мөлшері бойынша оны ары қарай төмендетумен несие береді, – дейді аталған банктің орталық филиалының директоры Жансұлтан Матаев.
Ал баспаналы болған №58 мектеп-гимназиясының мұғалімі Гүлбану Секен Қостанай өңірінен келіп, 4 жыл бойы пәтер жалдап тұрғанын айтты. Ұстаздық өтілі 16 жылды құрапты.
– Бас-аяғы 40 шаршы метр болатын бір бөлмелі пәтердің құны 12 млн 896 мың теңгеге шығып, несие 19 жылға рәсімделді. Оның алғашқы 8 жылында 7 пайызбен 103 мың теңге төлесек, қалған 11 жылын 3,8 пайызбен 59 мың теңгемен қайтарамыз. Қымбатқа шыққан сияқты, – дейді ұстаз көңілінде қуанышы мен күдігі аралас.
